Shillong, Nailur 04 : Hadien 17 snem, ka Iingkashari Meghalaya High Court kala pynduh pyndam ia ki jingkynnoh pyrshah ia ka Myntri barim ka tnad Pule Puthi Dr Ampareen Lyngdoh, u Director barim ka Elementary & Mass Education JS Sangma bad Deputy Director barim Ameka I Lyngdoh haba iadei bad ka jingkynnoh leh bym hok ha ka jingthungkam Assistant Teacher ki skul Lower Primary ka Sorkar ha u snem 2008.
Ka Central Bureau of Investigation (CBI) kala register ia ka case ha u 2018 halorka ejahar bala mudui ha u snem 2011, ba kynnoh ba ki nongshah kynnoh kila iasuhbuit ban pynkylla ia ki score sheet bad iarap ia ki katto katne ki kyrtong. Kane ka jingjied ka dei ha ki san tylli ki Centre lane Sub-Division : Shillong, Jowai, Amlarem, Tura bad Dadenggre.
Ka CBI kala file ia ka chargesheet ha u 2020, bad u Special Judge (CBI) ula kyntait ia ka aplikeshon ki nongshah kynnoh ban pyllait ia ki ha u snem 2022.
“Haba khmih ia ka jingbam por ban shong bishar ia baroh ki sakhi, ka lah ban shimpor haduh ka jingim ba sah jong ki nongshah kynnoh. Kumta, haba pyntreikam ia ka bor hapoh ka kyndon 227 jong ka Code pule lang bad ka kyndon 482, khamtam ka bynta ba kren bad ka bor jong ka Iingkashari ban khanglad ia ka jingpyndonkam bakla ia ki rukom treikam jong kine kino ki Iingkashari lane ban pynthikna ia kaba kut jong ka jingbishar hok, nga kdat noh sharud ia ka hukum ba shipor ba 23 tarik Nailar 2022 bala pynmih da ka Special (CBI case No 2 of 2020 da u Special Judge (CBI) ka East Khasi Hills Shillong. Ki jingkynnoh pyrshah ia ki nongshah kynnoh A1, A2 bad A3 la pynduh pyndam noh. Ia ki jingbishar baroh kiba la dep ruh la khein duh khein dam noh. Ia kine ki nongshah kynnoh 1, 2, bad 3 la pyllait noh na ka mukotduma” ong ka Iingkashari u Chief Justice IP Mukerji ha ka hukum ba pynmih ha ka sngi Palei.
Ia kane ka rai jong ka Iingkashari la pynshong nongrim halor ka jingbym lah u nongiasaid ain ka liang pyrshah ban pynshisha ia ka jingleh bym hok pyrshah ia kine ki nongshah kynnoh.
Ka Iingkashari ka sngew ba ki lai tylli ki kot ba pyni ia ki jingkhein ia ki mark jong ka result la soi da ki san ngut ki briew, kaba pynartatien ban don ka jingleh thok.
Ka ong ba ka slip ba pyni ia ka jingpynkylla ia ki marks ruh kim pat biang satia kum ki sakhi bad ki lah ban don shibun kiei kiei ha lyndet jong ki.
Ka Iingkashari kala pynpaw ruh ba ym don satia kano kano ka kot ka slab a pyni ia ka jingpyndonkam ia ka sia lieh ban pyndam ia ki marks.
“Mynta, ka mukotduma ban pynngat kam bymman ka long ba ka AI, A2 bad A3 ki iasuhbuit, iasylla bad iatreilang hapdeng jong ki. Kila pynkylla ia ki score sheet, namar kata, kila bujli ia ki kyrtong kiba pass da ki kyrtong kaba ki mon. Ka original score sheet ka iapher. La pyndonkam ia ka sia lieh ban pyndap ia ki marks bad thoh bujli da ki mark ba heh ne ba rit ban ai jaka ia ki kyrtong ba ki mon bad ban weng noh ia kiba kim mon. Nalor kata, la kynnph ruh ba ka nongshah kynnoh No1 (Ampareen Lyngdoh) da ka jingpyndonkam ia ka bor kum ka Myntri, kala phah ia ka slip ba bthah ia ki Ophisar ba pynkhreh ia ki jingkhein jingdiah jong ki score sheet ba kin pynkylla ia ki marks. Haba nyngkong, ki lai tylli ki kot ki pyni ia ki jingkhein marks ha ki kyrdan bapher bapher, la soi da ki san ngut ki briew. Kaba ar, ka slip bala wanrah kum ka sakhi, kam shym la pyni satia ia kano kano ka jingbthah ban pynkylla ia ki marks. Kam shym don ruh kano kano ka kot ka slab a pyni ia ka jingtah sia lieh” ong ka Iingkashari.
“Mynta, haba pyntreikam ïa ki nongrim ba la buh ha ki rai jong ka Iingkashari Supreme Court, lada ka mukotduma ba nyngkong ba la wanrah da ka liang pyrshah , na ki kot ki sla, ki rekod bad kiwei kiwei ki sakhi ka long kaba tlot haduh katta katta ba ka jingsuba kaba don nongrim kam don satia pyrshah ia ki nongshah kynnoh, ka Ïingkashari haba bishar ia kine ki sakhi ka aibor ban pyllait noh ia ki nongshah kynnoh,” kalaong bad bynrap “Ha kane ka mukotduma, na ka liang ki nongiasaid pyrshah kim shym la lah ban pynshisha wat tang ia ki jingkynnoh.”
Ka Iingkashari kala pynpaw ruh ba kane ka jingthung nonghikai ka dei kaba la leh ha u snem 2008, bad ka mukotduma kaba sahteng la palat 17 snem, kaba la ktah jur ia ka jingmut jingpyrkhat jong ki nongshah kynnoh. Kala ban jur ia ka jingkongsan ban khanglad ia ka jingpyndonkam bakla ia ki bor tian bishar bad ban pynthikna ia ka jingkut da ka jingbishar kaba hok.
