Manipur, K’lyngkot 11:Uwei u bom ba khlainbor ula bthei noh shabar ka khyrdop jong kawei ka iing ha ka thain kaba hap hapoh Nagamapal Kangjabi Leirak Imphal Police Station, Manipur ha ka miet jong ka 9 tarik mynta u bnai, ong ka tyllong khubor.
Ki tyllong khubor kila kam ruh ba ia une u bom la pynbthei da ki runar ki bym lah ban ithuh hakhmat ka khyrdop ka iingsah jong uwei u briew ia uba la tip kyrteng kum u Doren Leikangbam.
Hynrei, watla katta ia ka daw halor kane ka kam thombor ym pat lah ban tip thikna, bad ha kane ka jingjia kam shym la don satia kano kano ka jingjia ba sngewsih lait noh ka jingjulor ha ki katto katne ki bynta jong katei ka jaka.
Hadien jong kane ka jingjia, ka kynhun ki pulit na Imphal West kila pynlong ka jingwan jurip sha kane ka jaka bad pynlong ia ka jingtohkit kaba bniah.
Ha kawei pat ka bynta, na ka liang ki nongshong shnong kane ka thain ki la pynrem jur halor kane ka kam thombor ha ki jaka shong shnong.
Dang shen kawei ka khynnah ka la duh noh ia shiliang ka kti ka diang hadien ka jingbthei bom hapoh Sonitpur district ka Assam kaba la jia ha ka 5 tarik mynta u bnai.
Katkum ki khubor la ong ba kane ka jingjia ka la jia hapoh Bandar Guri hajan Bhaluk Pung railway station ha Sonitpur district.
Ia katei ka khynnah kaba la mynsaw jur ia kaba la tip kyrteng kum ka Rashmi Basumatary la pynkit noh mardor shapoh Tezpur Medical College Hospital (TMCH) na ka bynta ban aijingsumar. Hadien kane la pynkynriah sha Guwahati Medical College and Hospital (GMCH) na ka bynta ban ioh ia ka jingsumar kaba kham biang.
“Utei u bom u don harud jong ka lynti surok hadien ba katei ka khynnah ka la shim ia u katba ka dang wanphai sha la iing hadien ba une u bom ula bthei noh,” ong u Sushanta Biswa Sarma uba dei u superintendent of police (SP), Sonitpur lyngba ki lad pathai khubor.
