Shillong, Jylliew 19 :Ka National People’s Party (NPP) kala pynkhyllem noh ia ka Executive Committee ba ialam da ka United Democratic Party (UDP) ha Khasi Hills Autonomous District Council (KHADC) hynne ka sngi Nyngkong.
Ia kane ka Executive Committee ba ialam da u MDC ka UDP na Sohra Bah Titostarwell Chyne la pynkhyllem lyngba ka No Confidence Motion (NCM) bala wanrah da u MDC ka NPP na Rambrai-Jyrngam Bah Bajop Pyngrope pyrshah ia u CEM, ha ka sngi sdang jong ka Dorbar lyiur ka Council hynne ka sngi.
Ka No-Confidence-Motion kala ioh ia ka jingkyrshan jong ki 17 ngut ki Dkhot ka Iingdorbar ba don 30 ngut ki MDC, kaba la biang pura u nombor ban pynkhyllem ia ka Executive Committee.
U Lamphang ka Iingdorbar Bah Lamphrang Blah ula wanrah ia ka NC sha ka jingiavote bad pynbna syndon ba ka EC hapoh ka jingialam u Bah Titostarwell Chyne kala khyllem mynta ka sngi hadien ba 17 ngut ki Dkhot kila kyrshan ia ka NC pyrshah ia u.
Kine ki 17 ngut ki MDC ba kyrshan ki kynthup ia 11 ngut ki MDC ka NPP bad 6 ngut ki MDC ka Congress
U Bah Lamphrang ula pynbna ruh ba ia ka elekshon ban jied thymmai ia u Chief Executive Member (CEM) yn sa pynlong lashai ka sngi ba-ar ka 20 tarik Jylliew ha ka por 11 baje mynstep.
Ula bthah ruh ia ki dkhot ba kwah iakhun ia ka elekshon ba kin leit thep kyrteng noh mynta hi ka sngi sha u Secretary ka Tnad Legislative bad ia ka jingbishar kyrteng yn sa pynlong mynta hi ka sngi.
U MDC ka Sohryngkham Bah Pyniaid Sing Syiem u la leit thep kyrteng kum u kyrtong ka NPP ban iakhun ia kane ka elekshon CEM ba thymmai jong ka Council.
Shuwa ia kane, u Bah Titos ula khein ia kane ka No Confidence Motion kum ka kam shet kylla jong ka NPP.
