Shillong, Iaiong 29: Ki paid riewngeit kiba dang bat ha ka niam tynrai, ha ka sngi u Blei, kila leit ban pynkhuid paidbah ïa u lum jingthang jong ka Seng Khasi Seng Kmie uba don ha Jaiaw.
Ïa kane ka jingpynkhuid kaba shisien shi snem, la pynlong da ka Lum Jingthang Committee jongka Seng Khasi Kmie, ïa kaba la wan ban ïashim bynta lang ruh da ki paid ka Seiñ Raij, Shillong.
Ha kane ka jingpynkhuid la iashimbynta lang da u Syiem ka Hima Mylliem u Pa’iem Ainam Manik Syiem, u President bad General Secretary jong ka Seng Khasi Kmie kiba kynthup ia u Bah O.Pyngrope, Bahh Hainess Marbaniang, ki nongïalam ba hakhmat ka Seiñ Raij Shillong, ki dkhot ka Jylli Pyrkhat Kam (JPK) ka Seng Khasi Kmie, ki parakur ki parakha naduh ki riew tymmen, ki rangbah, ki longkmie, ki samla, kynthei bad shynrang bad ki khynnah barit.
Ha shwa ban sdang ka jingpynkhuid, u President Seng Khasi Kmie Bah O. Pyngrope, ula kyntiew ïa ka lama jong ka Seng, ïa kaba la pynbud pat da ka nguh ka dem ka khat ka shat ka khnong ka bishar, ka song kwai ka song tympew, kaba la pyndep da u riew Tymmen u Riewsan ka Seng Khasi Kmie u Bah Skor Jala.
Ka Lum Jingthang Committee kala pynkup burom da kaba ai da ki syrnot sah kynmaw sha ki parakur ki parakha kiba la noh kylluid mynsiem sha u sup u thiar kynshew pisa jong ka Lum Jingthang Committee, ïa kaba la sam bad aiti sha ki da u President ka Seng Khasi Kmie bad kumjuh da u kongsan.
U Pa’iem Ainam Manik Syiem ula ai jingkren kum u kongsan ha kane ka sngi bad hadien kane ula ïashim bynta bad ki ki paidbah ban pynkhuid ïa une u lum kyntang, u lum ba juh pyndep ïa ka leh niam kaba khatduh ïa kito kiba la duh noh ïa la ka mynsiem ksiar ka mynsiem rupa.
Ha kane ka sngi, la pynkhuid ïa baroh ki sawdong ki sawkun jong une u lum bad ban sar bad ban sait ïa ki kor shong thait, ïa ki kpep bad kiwei kiwei ki bynta kiba hap hapoh u pud u sam jong une u lum uab don ha Jaiaw.
