Shillong, Jylliew 05 : U President ka Meghalaya Pradesh Congress Committee Bah Vincent H Pala ula pyntip ba u MLA ka Gambegre Saleng A sangma ula pynpaw ia ka jinglong ba kloi ba iehnoh ia ka shuki MLA bad ban leit mihkhmat noh kum u MP ka Tura Parliamentary constituency.
U Saleng A Sangma ula pynliem ia ka para u Myntri Rangbah ka Jylla ka Agatha K Sangma da palat 1.55 lak vote.
“U (Saleng) hap ban shim ia ka rai hapoh ka 15 sngi la un iehnoh ia ka shuki ne kumno” ong u Bah Pala.
Haba kylli la ka party kan iakynduh ban shim rai halor kane ka kam, u President ka Congress ula ong “Hashuwa ba un thep kyrteng, u (Saleng) la pynpaw ha ngi ba u long uba khreh ban iehnoh iaka shuki MLA bad iaid noh kum u MP”.
Haba niew ia ka jingjop u Saleng kum ka kabu ban pynkhie im ia ka Congress ha Ri-lum Garo, u Bah Pala ula ong b aka party mynta kam don nongialam shuh ha ka thain.
“Ka long kaba sngewsih ba ngi duh lut ia baroh ki nongtrei, ngi duh lut ia baroh ki dkhot ha Ri-lum Garo bad ngim don nongialam shuh bad da ka jingwan u Saleng, nga tharai ka Congress kala don lawei biang ha Ri-lum Garo..Namar kata nga sngewnguh eh ia ki paidbah ba ki ailad ia ka congress ba kan wan phai bad shakri ia ki paidbah ka Ri-lum Garo” ula ong.
