Shillong, Lber 04 : U National President ka NPP Conrad K Sangma, ula pynkhreh ban bam smai kum u Myntri Rangbah ka Jylla ha ka 7 tarik Lber.
U Myntri Rangbah Duh ka Ri Narendra Modi bad u Myntri kam Pohiing Amit Shah, ki lah ban wan iashimbynta ha kane ka jingialang bam smai jong ka Kynhun ki Myntri Sorkar ka ban long ha Raj Bhavan.
U Conrad ula ioh ia ka jingkyrshan jong 32 nngut ki MLA ba kynthup ia 26 ngut ki MLA ka NPP, 2-BJP, 2-HSPDP bad 2 ngut ki MLA shimet. Hynrei, um pat jer kyrteng satia ia kane ka kynhun synrop.
U MLA bala rangbah bha na Resubelpara Timothy D Shira ula bam smai kum u Protem Speaker hynne ka sngi ha Raj Bhavan. Ka jingpynbam smai ia ki 59 ngut ki MLA ba dang shu shah jied thymmai, kan long ha ka Iingdorbar Thaw Ain ka Jylla la 6 tarik Lber.
Haba iakren bad ki nongthoh khubor, u Conrad ula ong “Nga la ioh ia ka shithi na u Lat ka Jylla ba khot ia nga ban thaw ia ka Sorkar bad ka jingbam smai jong ka Kynhun Myntri kan long a 7 tarik Lber, hangne ha Raj Bhavan. Ngi khmih lynti ruh ba u Myntri Rangbah Duh bad u Myntri kam Pohiing ka Ri kin wan iadonlang ha kane ka jingialang pynbam smai”.
U Conrad ula pyntip ba la dep ban shim ia baroh ki sienjam ban pynthikna ba ka jingialang pynbam smai kan ym shah pynthut namar ka jingdon ki kynhun ba pyrshah ia ka jingwan kyrshan jong ki arngut ki MLA ka HSPDP ia ka NPP.
Halor ka shithi ka HSPDP ba kyntait ia ka jingai jingkyrshan, u Conrad ula ong “Kane ka dei tang ka Seng sain pyrthei kaba phah ia ka shithi hynrei ka dei ka Parliamentary Party bad ka Legislative Party kaba kongsan bad baroh arngut ki MLA kila ai ia ka shithi ban kyrshan ia ngi”.
Ula ong ba ia ka kyrteng jong ka kynhun synrop bad kiwei kiwei, yn sa shim rai hadien ba kila shong ia ka jingialang.
U Conrad ula pyntip ba ka NPP kala iakren ruh bad kiwei kiwei ki seng sain pyrthei “hynrei ia ki jingtip ba bniah shaphang kane, yn ym lah satia ban iathuh mynta hynrei kine ki seng sain pyrthei kila iakren phone bad ngi”.
Haba niew ia ka jingwiang ding ia ka Ophis u MLA ka HSPDP ha Laitumkhrah kum ka jingjia kaba sngewsih, une u Khliehduh ka NPP ua ong “Ka long kaba sngewsih ban iohi ba kum kane ka jinglong ki briew ngi iohi, ia kaba ka Meghalaya kam pat ju iohi mynno mynno ruh. Ka Meghalaya ka dei kaba ngeit ha ka riti synshar paidbah. Ngi ju pdiang beit ia ka rai u paidbah bad ha kane ka elekshon, ki paidbah kila jied iala ki nongmihkhmat bad da ka lynti jong ka Riti Synshar paidbah, ngi la thaw ia kane ka Sorkar ba mynta”.
Haba kynthoh ia ka jingiakhih ki Sengbhalang kiba pyrshah ia ka jingwan kyrshan ki MLA ka HSPDP, u Conrad ula ong “Kine ki MLA ki dei kiba la jied da u paudbah jong ki Constituency bad namar kata, ka dei ka rai u paidbah bad ka dei ka hok jong kine ki MLA ban rai iano ba ki kwah kyrshan. Ki Sengbhalang ki lah ban don la ka jong ka jingsngew hynrei kane kam don jingiadei eiei ruh em bad ka rai bala ai da u paidbah ha ka elekshon”.
Halor ka jingdawa Myntri Rangbah da u Khasi, u Conrad ula ong ba don da ka lynti ha ka ban thaw ia ka Sorkar bad la jied ia u Myntri Rangbah. “Namar kata, hooid ki jingsngew ki don beit hynrei haba kut, ka don da ka lynti kaba la dep batai shai. Kam mut satia ba tang u briew ba dei na kawei ka Jaidbynriew uba lah ban bat ia ka kam (Myntri Rangbah) ne ym lah ban bat. Ka riti synshar paidbah kam iaid kumne. Ka shong ha ka rai kaba la ai da ki paidbah haba jied nongmihkhmat bad ki Nongmihkhmat bala jied da ki paidbah ki jied pat ia u Nongialam”.
Haba kylli kumno yn pyn thikna ba ka Sorkar kan skhem tang da 32 ngut ki MLA, u Conrad ula ong “Baroh ka shong ha ka rukom treikam jong ngi. Ngi la iohi ha ki 5 snem bala leit noh, ngi la mad ia shibun ki jingtynjuh hynrei da ka jingpynthikna ba kan don ka jingiatreilang kum ka kynhun, da ka jingpynthikna ba baroh kin ioh bynta lang bad pynleit jingmut bha ha ki kam pynroi, kine kila iarap ia ngi ban pynthikna ha kaban neh bad pyniaid ia ka sorkar ha baroh 5 snem wat hapdeng ka jingdon bun tylli ki seng sain pyrthei”.
“Ka dei kaba eh ban pyniaid ia ka sorkar synrop hynrei ngin pyrshang kat kaba lah ban pynthikna ba baroh ki paralok kin ioh ia ka bynta ban treikam bad ban pynthikna ruh ia ka jingiasyllok lang man ka por haba shim ia kino kino ki rai ba kongsan” ula ong.
