Shillong, Jylliew 30: Ka United Democratic Party kala pynkhreh ia 8 tylli ki jingai jingmut ban ai shaka Expert Committee ka ban shong bishar thymmai ia ka State Reservation Policy.
Ia kane la pyntip da u General Secretary ka UDP bah Jemino Mawthoh haba kren sha ki lad pathai khubor hadien ka jingialang jong ka Central Executive Committee jong Party.
U bah Jemino ula iathuh baka CEC jong ka Party ka la iathir bad iatai sani bha halor ka Reservation Policy bad ka Roster System bad kala pynkhreh ia ki jingai jingmut ban sap hah sha ka Expert Committee ba la thung da ka sorkar jylla.
U bah Jemino ula ba ka UDP kala shimkhia bha ia kane ka kam namar ym tang kiwei kiwei ki kynhun kiba kwah ban khmih bniah biang ia ka Reservation Policy hynrei wat ka party ruh ka kwah.
“Ka UDP ka la bsuh ruh ia kane ka mat ha ka thup kular ilekshon ba la dep bad hadien kata ka Party kala shong jin kumba 12-13 sien ki jingialang ban iathir kumno ban ai jingmut halor ka Reservation Policy bym pat ju khmih bniah thymmai mynta la 51 snem kynthih” la ong u bah Jemino.
U bah Jemino ula iathuh baka Party kala shim jingmut ruh naki stad ain lane ki Legal Expert, ki Scholars bad ki Social Scientist kumno ban pynwandur ia ka Reservation Policy bad ka Roster System khnang ba ki jaidbynriew ha kane ka jylla kin ym shah ktah.
“Ngi kwah ban pynwandur ha kata ka rukom bad ngi kwah ba ka sorkar lada ka pynwandur kan ym don ka jingleh shiliang bad kan long kaba pdiang hun da baroh ki jaidbynriew kiba shong basah ha kane ka jylla” ula ong.
Ula iathuh ruh baka CEC ka la aibor ha ka Core Committee jong ka UDP ban leh ia kaba donkam na ka bynta ban bsuh ia ki jingai jingmut jong ka CEC namar kane ka mat kam dei ka ba suk bad naka liang ka ka Core committee kan shim por sa tang ar ne lai sngi ban leh iaka ba donkam hashuwa ban phah sha ka sorkar.
Pule ruh: Plie ka skul Alpha ia ka Computer Science Lab ban pynsah nam ia i (L) SS Blah
