Shillong, Naitung 12 : U Myntri ka kam jngohkai Bah Paul Lyngdoh hynne ka sngi Balang, ula pyntip ba ka Sorkar Jylla kala pynkhreh ban wanrah ia kawei ka prokram kaba heh bha ka ban bei tyngka ia 1000 tylli ki homestay ha ka shisnem.
“Kane ka mut ba ngin sa mang pisa ia palat 5000 tylli ki homestay ha kine ki san snem ban wan bad kane kan plie ruh ia ki lad ki lynti ia ki samla bad ki nongsengkam” ong u Bah Paul haba iakren bad ki nongthoh khubor.
Haba kyntu ia ki paidbah ban shim kabu na ka homestay project, u Myntri ula ong “Na ka song pisa ba T.10 lak kawei ka homestay, 70% yn bei pura da ka Sorkar Jylla lyngba ka PMEG bad kaba tam ka pisa kaba long 30% kan wan kum ka ram na ka Meghalaya Rural Bank (MRB) ha kaba ym donkam ruh ban buh bynda”.
“Nga kwah ban pynshlur ia ka jingaplai ba bun ban wan shakhmat. Baroh kine ki application yn khmih da ka MRB bad hadien bala dep, ka Bank kan sa pyntip sha ka tnad jong ngi bad ka Tnad kan sa ai ia ka song pisa bad kane pat kan sa leit beit beit sha ki account jong ki nongpan ” ula bynrap.
Khnang ban nang kyntiew ia ki kam jngohkai, u Bah Paul ula pynbna ruh ia ka rai jong ka Sorkar ban wanrah ia katto katne ki project kiba kongsan ba kynthup ia ka Orchid Lake Resort, Polo Orchid Shillong hapoh ka Joint Venture bad ong ba kan sa don ka jingiasoi soskular hapdeng ka Sorkar bad ki kynhun shimet ka ban shong kat kum ka jingshemphang jong ki ha ki kam jngohkai bad ka jingpynbiang ia ki jaka sah.
“Ngi khmih lynti ban gin lah ban pynmih kham bun ka khajna lyngba ka jingiashimbynta ki kynhun simet ha ka kam jngoh kai” ula ong.
Ula pyntip ba ka Jylla kan sa iohnong ruh bun bah na ka soskular shim ram ka ban sa iasoi hapdeng ka Sorkar India bad ka New Development Bank (NDB) ba kan bei tyngka ia ka Meghalaya Eco-tourism Infrastructure Development Programme (MEIDP).
“Lyngba kane ka soskular shim ram, ngi sa lah ban nang shna ia ki jaka sah jong ki nongshangkai pyrthei ha ki jaka kum ha Kongthong, Mawlyndep, Mawlam. Kan don ruh ka jingshan pynheh bad pynbha ia ka jaka pynlong ia ka tamasa Wangala bad ruh ka Tura Convention Centre” ong u Bah Paul haba pyntip ba ki kam kila nang iaid mynta haba iadei bad ka jingtei pynheh ia ka Tura Convention Centre kaba la mang pisa haduh T. 50 klur.
Pule lang ia kane: Pynlong jingiakhih ki Nongrep ka CPIM, dawa pynkiew ia ka MSP bad ki jingmyntoi ki Nongrep
