Shillong, Jymmang 03: Ka Sorkar Jylla ka dang pynkhreh ban pyntreikam ia ka Phase-II jong ka kam ban weng ia ka jing khapngiah ka Nongbah Shillong.
Hadien ba pyniaid ia ka jingialang hynne ka sngi Thohdieng, u Myntri Rangbah ka Jylla Conrad K Sangma ula ong ba bun ki jaka Sorkar, kiba la shu buh khlem pyndonkam, la dep aiti mynta sha ka Tnad Urban Affairs ha ka Phase-I jong ka prokram.
Ka Tnad Urban Affairs kala jam shakhmat ha kaban shna ia ki parking lot ha Wards Lake, NEIGRIHMS, jaka ka Tnad Forest ha Polo, bad ka jaka ka MeECL ha Polo. La dep ban khot tender ia ki bad ha ki katto katne ki jaka, ki kam kila dep sdang.
U Conrad ula pyntip ba kala don ka jingtyrwa ban pynkynriah noh shen ia ka Ophis ka PWD na Barik Point khnang ban pynkylla ia kane ka jaka kum ka jaka pynieng kali bad ban thungdieng nalor ban pynieng ia ka lama ka Ri.
Kat kum ka jingong jong u, ka Bunglow ka Sorkar ha Barik Point ruh yn sa pynkylla noh sha ka jaka pynieng kali.
“Kumjuh ruh ka Hydari Park yn sa pynkylla kum ka jaka pynieng kali hadien bala pynkynriah ia baroh ki mrad na katei ka jaka hapoh ka 3-4 bnai. Baroh kine ki jingiakren kila mih bad baroh ki jaka kiba don ha ki Tnad, ki bym shym la pyndonkam ha ka lynti kaba dei, ngi la pyrkhat ban pyndonkam noh ha kiwei ki bynta la ki dei kiba don ha Nongbah Shillong ne ha kiwei ki jaka jong ka Jylla” ula ong.
Ha kajuh ka por, u Myntri Rangbah u pyntip ba ka Sorkar kan sa nang trei pynheh ruh ia ka surok bad shna ia ka lynti iaid kjat na Shillong Club shaduh ka lad Iing u Lat ka Jylla bad haduh ka lad Pinewood.
“Hangne, ngin sa shim ia katto katne bynta ka jaka jong ka Tnad Tourism bad ka Tnad Khlaw haduh ha Wards Lake ban shna ia ka lynti iaid kjat khnang ba ki briew kin ioh iaid kjat nangne” ula ong.
