Shillong, Jymmang 02 : Ka Sorkar Jylla kan sa sdang noh shen ia ka kam ban pynbha biang ia ki jaka ba julor na ka jingtih marpoh khyndew ha kylleng ki jaka ba don ki par marpoh khyndew ha ka Jylla.
U Myntri Rangbah Conrad K Sangma ula lum ia ka jingialang halor kane ka kam bad ki Heh Ophisar ka Tnad Mining bad ka Forest lem bad ki nongmihkhmat na ka Central Mine Planning & Design Institute Limited (CMPDI) hynne ka sngi ba-ar.
Productive meeting with officials of @cmpdil, Forest and Mining Departments to work towards implementing plans for mine reclamation. @JoshiPralhad @MinesMinIndia pic.twitter.com/whFQH2Rtbk
— Conrad K Sangma (@SangmaConrad) May 2, 2023
Hadien ka jingialang, u Conrad ula ong “Kane ka dei ka jingialang bala pynlong hapdeng ka CMPDI bad ka Tnad Forest & Mining bad ka jingthmu ba hakhmat eh ka long ban pynkhreh ia ka plan ha ka ban pynbha pat ia ki jaka tih mawpoh khyndew la ki dei ki minor mineral (maw,shyiap ter ter) ne ki major mineral (dewiong, mawshun ter ter)”.
Haba pyntip ba ka don ka song pisa bad ka Sorkar ban pynbha pat ia kine ki jaka tih marpoh khyndew, u Myntri Rangbah ula ong “ Kumta, kane ka dei ka kam kaba ngi kwah ban sdang bad ngi la dep iakren bad bun ki Agency hynrei mynta bad ka CMPDI kaba dei ka agency kaba shemphang bha halor kane ka kam bad ka agency ka sorkar India kaba la shemphang ha baroh ki bynta”.
“Ngi la iakren sani bha bad ki bad ngi la iasyllok kumno ba ngim jam shakhmat halor kane ka kam ban pynbha pat ia ki jaka tih marpoh khyndew” ula bynrap.
