Shillong Jylliew 07: U Myntri ka tnad Social Welfare Bah Paul Lyngdoh hynne ka sngi Balang ula pyntip ba ka tnad shen kan sa pynlong iaka jingleh survey thymmai halor ka jingdon jong ki nongdih drug bad ban buh bun tylli ki Rehabilitation Centre ha ka jylla.
Haba iakren bad ki nongthoh khubor u Bah Paul Lyngdoh ula ong ba ki don palat 2.5 lak ngut ki nongdih drug ha ka jylla kat kum ka jingtip kiba la don lypa mynta ha ka tnad sorkar bad kine kidei ki jingtip kiba la lum lai snem mynshwa bad kiba bun hi kiba dih drug ki dei ki samla kiba ha ka rta 20-30 snem.
“Kine kidei ki jingkhein jong ka tnad sorkar kiba 3 snem mynshwa bad ngi donkam ban peit thymmai biang ia ka jingkhein, kumta shisien ba la ioh ia u Director uba thymmai ngin sa sdang noh iaka jingle iaka jingsorjamin kaba thymmai halor ka jingdon jong ki briew kiba pyndonkam ia u drug” ong u Bah Paul.
Ula pynpaw ba kiba bun kiba dih drug kidei ki khynnah bad ki samla kynthei bad shynrang kumta kane ka lah ban donbynta bad ka jingpang HIV/AIDs, kumta ka long kaba donkam ban pynlong ia ki prokram ban pynsngewthuh paidbah bad ka long kaba donkam ban phaikhmat bha ha kane ka liang.
U Myntri ula ong ba ka sorkar kan pynjur iaka jingshim ia ki lad treikam ha kaban don ia ki Rehabilitation Centre naka bynta ki dkhot jong ka imlang sahlang kiba la kum iaid bakla ha ka lynti ka jongki bad dei ban lah ban pynurlong ia kane ha baroh ki bynta jong ka jylla ha kine ki 6 bnai ban wan.
“Ngi don ia ka jingthmu ban tei bun tylli ki Rehabilitation Centre, hynrei ka jingeh kaba mih ka long ba ki Centre kiba pyniaid da ki riewshimet ki shim palat haka dor kaba rem, kumta ka sorkar ka donkam ban tuklar hynrei namar ba nga dang shu shimti ia ka kam bad ym pat dap ruh 3 bnai. Ngi sa phaikhmat bha halor kane bad ngin ialeh ha kaban tei iala ki jong ki Rehabilitation Centre da kaba sdang shna naka nongbah jong ka jylla” ong u Bah Paul.
Halor ka jingshim remdor palat ki Rehabilitation Centre jong ki riewshimet, u Bah Paul ula ong, ba ka long kaba donkam ban don iaka jingialang hapdeng ak tnad ka koit ka khiah bad ka tnad Social Welfare ban ngam jylliew halor kane ka mat bad ban pynmih ia ki plan jong ka rukom treikam.
Nalor kane ula banjur ruh iaka jingdonkam ban pynkhlain shuh shuh iaki Rule jong ka NDPS Act ban pynkup bor ia ki pulit ba kin lah ban tehlakam ha kaba iadei bad ka jingdie be-ain ia u drug.
Ula ong ba ka long kaba donkam ban pynkylal ia ki Rule jong ka NDPS Act ban pynkup bor ia ki dorbar shnong khnang ba yn lah ban rat dingkhong ia ka jingjur jong u drug ha ka imlang sahlang.
“Kane kadei ka jingkitkhlieh kaba ngan shim hi halade ban pynkup bor ia ki dorbar shnong ban rat dingkhong iaka kam jyrsieh jong u drug” ong u Bah Paul.
“Namar ba phi la kdew shaphang ka shnong Mawprem, shen haba nga la shah jied kum u nongmihkhmat, ngi la pynjur iaka jingkhynra bad kila don bun ki khubor jong ka jingjop bad iaka jingkurup bun bah u drug bad ngidonkam ban ai jingkyrshan bad jingiatreilang na ka imlang sahlang” ong u Bah Paul.
Haba kylli la ka don ka jingiasylla hapdeng ki nongkhaii drug bad ki pulit, u MyntriSorkar ula ong, “Lada phi kynmaw, kane kadei ka ishu kaba nga la rah hapoh ka iingdorbar thawain ka jylla 5-6 snem mynshwa bad mynta namar nga dei uba khmih iaka tnad social welfare, nga pynthikna ba ngin pynskhem triang iaka rukom treikam bad yn ym don uno uno khamtam uba don ha ki uniphom yn ioh iaka lad ban leh ia ka kam be-aiñ”.
