Shillong Jylliew 19: Ka jingpyniaid iaki 108 Ambulance ha ka jylla Meghalaya haduh mynta ka dang sahteng ban aiti noh shaka kompani shimet kaba pura ban pyniaid ia kane kam.
Ia ka 108 Ambulance Services mynta la pyniaid da ka National Health Mission (NHM) hadien ba ka sorkar jylla kala pynkut noh iaka kontrak bad ka GVK- EMRI ha u snem 2022.
La sdang iaka jingpyntreikam iaka 108 Services ha ka jylla naduh u snem 2008.
Haba iakren bad ki nongthoh khubor, ka Myntri ka koit ka khiah ka Dr Ampareen Lyngdoh hynne ka Lah Sngi u Blei kala pyntip ba ka Sorkar mynta ka dang khmih bniah bha, kumno bad kaei ka lynti kaba bha tam nangne shakhmat ban pyntreikam iaka 108 Services.
Haba kren shaphang ka NHM, kala ong ba ka NHM kam dei satia ka kynhun kaba paka ne kaba la pyntbit ne don ia ki jingtip kiba bniah ban pyniaid iaka 108 Services ha ka jylla.
“Nga lah iakynduh ia ki nongtrei jong ka 108 bad ioh pdiang ruh ia ka dorkhas na ki. Ngi kwah ban pynthikna shwa ba ngin pdiang ia kano kano ka kompani, dei ban ai ka jingiada bad jingshngain ia baroh ki nongtrei jong ka 108 services. Ha kane ka por kaba mynta ngi dei ban iada ia ka jingshakri ka jongki bad ban phaikhmat sha ki jingmyntoi lada wan ban shimti da ka kompani kaba thymmai” ong ka Kong Ampareen.
Kala ong ba ka sorkar jylla ka dang pynkhreh iaka jingkhot tender ba la khmih lynti ba kan kham shim por bad ka sorkar kam kwah ban shu leh kyrkieh namar ba ka sngew ba kala don lypa ka 108 Services kaba treikam ha ka jylla bad kila don lypa ruh ki nongtrei kiba donbynta ha katei ka prokram.
“Ngi dei ban pyrkhat lem na ka bynta ka jongki bad ban pynthikna ba kano kano kaba ngi leh kan dei na ka bynta ka bha ka miat jong ki nongtrei.Shisien ba ngi lah sngewthuh bad ngi khot iaka tender ia kaba dang pynkhreh mynta ryngkat bad ka Expression of Interest kumta yn ialeh ban pyllait noh kham kloi” ong ka Myntri Sorkar.
Kala pynpaw ruh iaka jingsngewkhia halor ka jingdkoh ka rukom treikam jong ka 108 bad ka sorkar ka kwah ban aiti ha ka kynhun kaba tbit kaban kduplang ia ki nongtrei baroh jong ka 108 bad ba kan treikam bha ha kaban ai jingshakri iaka jylla.
“Haduh mynta ka sngi, ka 108 ka la long shisha ka shaka jong ka jingkyrmen bad ka shaka jong ka jingim. Ngi kwah ban pynthikna ba kane kan iai bteng bad kwah ba ka jingai jingshakri yn dang pyniar shuh shuh bad yn sa pynbiang shuh shuh ia ki Ambulance ban ai jingshakri ia ki nongpang ha ka jylla. Nga don iaka jingkyrmen kaba skhem ba ngin lah ban poi sha ka jingiamynjur khnang ban gin lah ban pynthikna ba kum kine ki lad ai jingshakri kan long kaba iaid thikna na ka bynta ka bha ka miat jong ki paidbah ka jylla” ong ka Kong Ampareen.
Pule ruh: Pynkhreh ka Health Deptt ia ka jingtyrwa ban lah pyntrei noh ia ka Shillong Medical College
