Shillong Nailur 04: Ka DUBAKH Sports Pvt. Ltd kala pynkhreh ban pynlong ia ka Shillong Inter School Basketball Tournament 2025 kaban sdang ha ka 6 tarik u Nailur 2025 ha Pearly Dew H.S.S, Jaiaw Laitdom.
Kane ka Shillong Inter School Basketball Tournament, kan sdang ha ka sngi saitjain naduh ka por 8 baje mynstep ha kaba bun tylli ki skul na kylleng jong ka nongbah Shillong kin wan iashimbynta ban pyni iala ka sap ka phong ha ka jingialehkai Basketball.
Ia ki kynhun la phiah ha ki ar tylli ki Group kiban iakhun ban iaknieh ban bat ia ka kyrdan kaba nyngkong.
Ka Group A ka kynthup ia ka Mizo Modern H.S.S, St Edmunds ISC, Mawkhar Christain bad ka Jaiaw Presbyterian.
Ka Group B ka kynthup ia ka Pearly Dew H.S.S, Shillong Public School, Dinet Manik Memorial bad ka Little Flower H.S.S.
Haba kren ha ka jingialang jong ka Managers’ Meeting, ki nongpyniaid ia kane ka jingiakob, kila pynpaw ia ka jingskhem jingmut ba kane ka lympung ialehkai kan wanrah ia ka mynsiem iakhun bad kan pynkhlain ruh ia ka jingialehkai Basketball ha kylleng ki bynta jong ka sor Shillong.
Kala kyntu bad iawer ia ki nongpeitkai, ki bahaiing bahasem bad ki riewieid ia ka Basketball ban wan ban sakhi ia kane ka lympung iakob ialehaki bad ban ai jingkyrshan ia ka kynhun kaba ki sngewtynnad.
