Shillong, Jymmang 14 : U Myntri ka Tnad Revenue & Disaster Management Bah Kyrmen Shylla ha ka sngi Balang ula ong ba ka Tnad kala pynkhreh nadong hadong ban tem ia kino kino ki jingjia kiba lah ban wan na ka daw jong u slap.
Haba iakren bad ki nongthoh khubor, u Bah Kyrmen ula ong ba ka Tnad kala pyrshang katba lah ban pynduna ia ki jingktah jong ki jinglynshop ki bor ka mariang lyngba ki lad ai jingmaham bapher bapher.
“Ngi kyntu ruh ia ki paidbah ban shim kabu ia kum kine ki lad ai jingmaham. Watla ngim lah ban shaniah ia ki shispah na shispah, dei dei pat ban long kiba la pynkhreh ha kano kano ka por” ula ong.
Ula ban jur ruh ba ka jingiatreilang bad ka jingkyrshan iwei ia iwei ka dei ka lad kaba bha tam ban weng ia kum kane ka jingeh.
Halor ka jingtwa khyndew ba dang shen ha National Highway-6, u Bah Kyrmen ula iathuh ba ki bor khmih kila pyrshang katba lah ban maramot ia ki jingjulor hynrei ka jingeh hangne ka long ba ki don bun palat ki trok kiba iaid lynti na kane ka surok.
“Mynta ka jingmaramot ka dang iaid ha sor Khliehriat bad ngi la iohi ba kala pynthut bha ia ki nongleit nongwan bad ki nongtrei kumta ngi hap ban iai shah ia mynta. Mynta ka kynti ka jingmaramot ka dei kaba la leh janai bha bad ka lah ban dei ka lynti ban weng ia ki jingeh bala mad da ki nongleit nongwan” ula ong haba pynpaw ba ka jingiaid jong ki kali ba kit mar palat pud ka lah ban dei ka jingeh kaba khraw ban sumar ia ka surok NG-06.
