Nongpoh, K’lyngkot 08 : Kumba ju leh manla u snem, ki khun ki hajar jong ka Raid Marwet sa shisien pat kin hiar madan biang ban pyndep ïaka kñia ka khriam ka ainguh aidem ïa u Blei nongbuh nongthaw haka lehñiam Sohjer, ka ban long haduh 4 sngi lynter mynta u bnai.
Kane ka jinglehniam ka dei kaba la pynlong ban buh ka nguh ka dem, ka kyrpad ka kyrpong hakhmat u Blei nongbuh nongthaw ba un kyrkhu kyrdoh ïaki khun ki hajar hadien ka jingioh kheit ïa u soh ba nyngkong jong ka jingtrei shitom baroh shisnem, ba une u snem un long u snem ba pahuh pahai bad dap jingkyrkhu ryngkat ka koit ka khiah.
Ïa katei ka lehñiam Sohjer bala pynlong da ka Sohjer Committee la rai ban sdang naduh ka 17 tarik haduh 20 tarik mynta u bnai ha 9 mer Baridua ha Ri-Bhoi.
Haba kren sha ki lad pathai khubor naka liang u Paiem Ken Syiem, Syiem ka Raid Marwet u la ong ba kane ka lehñiam Sohjer ka dei ka jinglehñiam ba shisien shisnem jong ki khun ki hajar ka Raid Marwet hadien ba kila dep ban lum ban lang ïa u kba u khaw, bad ioh kheit ïa u soh nyngkong ban buh ka jingtyrwa hakhmat u Blei nongbuh nongthaw ba un kyrkhu kyrdoh ïa ki khun ki hajar ka Raid Marwet bad khamtam ba un dang theh ki jingkyrkhu ba kin nang roi nangpar haki liang baroh.
U la ong ruh ba katei ka lehñiam Sohjer kan long haduh 4 sngi lynter bad naka liang u Syiem ryngkat ki longsan mansan jong ka Raid kin pyndep ïaka jingkñia ainguh haka 19 tarik, kaba dei ruh shibynta ban pynim ruh ïaka riti ka dustur ka kolshor tynrai bala buh naduh ki longshuwa manshuwa ba kjim dei ban duh ban dam noh, kumba bun naki samla ha kane ka juk ba mynta kila sdang ban klet bad bud tynneng ïaka jong kiwei.
Shuh shuh ha katei ka lehñiam Sohjer kan don ruh ka jinglehkmen paidbah kum ka tamasa lyngba ka rwai ka siaw, ka put ka tem ban sa wan shibynta da ki nongrwai ba paw ka jylla bad nabar jylla.
Kumta naka liang u Syiem u la khot la wer ïaki paidbah na kylleng ki shnong bad ki jaka ba kin wan ban sakhi ïa katei ka jinglehñiam bad ban sakhi ruh ïaka jingriewspah ka kolshor tynrai jong ka Raid Marwet, u la bynrap.
