Shillong, Jymmang 19: Ka Meghalaya Football Association kala pyndep iaka jingkhmih bniah ne Screening ha kylleng ki jaka na ka bynta ban pynlong ia ka jingiakhun jong ka Group Stage jong ka Meghalaya State Youth League.
Kane ka jingiakob ialehkai Football kan long ha ki ar bynta kata ka U-14 Boys bad U-16 Boys.
Ia ka zonal stage yn pynlong ha West Garo Hills, West Jaintia Hills, West Khasi Hills bad East Khasi Hills kaba kynthup kaba ialehkai ha la ka jaka bad shabar ka jaka lajong ryngkat bad ki jingiakhun ha ka Quarterfinal, Semifinal bad ia ka Final khnang ba ka jingpynkut ia katei ka jingiakob kan long kaba hsongkun.
Ka MFA kan pynlong ia kane ka jingiakob ha kylleng ka jylla hapdneg ki Club bad ki kynhun kiba pyniasoh bad ki District Associations, 20 tylli kin iashimbynta ha kane ka lympung kaba dang shu sdang mynta ka kynti.
Ka jingthmu jong kane ka jingiakob ka long ban plie lad ia ki kynhun jong ki khynnah ba kin ioh ia ka rynsan ba kin pyni iala ka sap ialehkai bad ban jied ia ki khynnah ba kin mihkhmat iaka jylla Meghalaya ha ka National Level.
Kane dei ruh ka sienjam kaban plie lad ia kine ki khynnah ialehkai ban ioh ban jam sha kawei pat ka bynta ban shah jied ban ioh ialehkai ha ki Club kiba heh bad ban pynlong iaka Meghalaya kaba khlain ha ka jingialehkai Football.
Ia ka jingkhmih bniah ia ka rta jong ki nongialehkai la leh da ka MFA ha Garo Hills ha ka 14 tarik u Jymmang bad ha kiwei pat ki jaka ha ka sngi Saitjain.
Ka MFA ka don ia ka jingthmu ban sang ban pynlong noh ia katei ka jingiakob ha u bnai ban wan bad ban pynlong tang ha ka sngi saitjaiñ khnang ba kan ym ktah iaka pue puthi jong ki khynnah.
