Shillong, Iaiong 15 : Ka Jylla Meghalaya kala pynkhreh nadong hadong ban pdiang burom ia ki Nongialam jong ki Ri ka pyrthei kiban wan iashimbynta ha ka jingialang G20 summit ‘Space Economy Leaders’ Meet (SELM).
U Principal Secretary ka Tnad Planning Shakeel Ahammad ula pyntip ba 28 ngut ki Heh OPhisar na ki Ri bapher bapher bad palat 100 ngut ki delegate kin wan ban iashimbynta kynthup ki technocrat.
“Kan dei ka kabu ia ka Jylla ban pyni ia la ka jong ka deity tynrai ba kham pher bad ka spah mariang bad khamtam eh ka jingkhuid bad ka akor ka burom” ong u Shakeel.
“Ban wan kum kine ki Heh Ophisar sha la Jylla jong ngi ka long kaba jia shisien lano eh.
Ngi dei ban pyni ia kaei kaba bha tam khnang ba kin leit phai da ka jingkynmaw ba sngewtynnad ka ban iarap ban pyninam bad kyntiew ia ka Meghalaya kum ka jaka wan shangkai, kynshew kam bad ka roi ka par” ula bynrap
Haduh 28 ki startups (nongsengkam) ha ka Space Economy kin wan ban iashimbynta ha kane ka jingialang bad kin sa pyni ia kiei ki kam ba ki leh shabar jong kane ka jingialang.
Ula bynrap ba nalor ka ISRO, kan don ruh ka jingpynnam da ki kynhun startup ha ka Space Economy.
