Shillong, Jylliew 13 : Ka Meghalaya Energy Corporation Limited (MeECL) kala pynkhreh ban shim ia ka sienjam ha ka ban ot noh naphang ia ki lain bording jong ki nongpyndonkam bording kiba pynsah ia ka bai bording ba palat T. 300 klur.
Haba iakren bad ki nongthoh khubor hynne ka sngi Ba-ar, u Managing Director ka MeECL Sanjay Goyal ula ong “Ngin shim ia ka sienjam ban ot noh naphang ia ka lain bording jong kito ki bym siew khuid ia ka bai bording”.
Ula pyntip ba ka Corporation kala phah dang shen ia ki shithi sha ki kompani mobile bapher bapher namar ka jingbym lah ban siew ia ka bai bording ba ki pyndonkam.
“Ki kompani mobile ki khlem siew ia ki bai bording ba pyndonkam ha ki mobile tower. Kine ki juh ki kompani ki pyniaid ia ki tower ha kylleng ki jaka hynrei kim shym la siew bai bording ha ki katto katne ki jaka. Ngi la thoh sha ki ba pyntip ba ngin ot noh ia ka bording lada kim lah ban siew ia ka bai bording jong baroh ki tower” ong u Goyal.
“Ngi dang pyrshang ban wad mano na ki nongpyndonkam bording kiba lah ban siew hynrei ki ba khlem siew khnang ia ka bai bording. Ngin wad ia kine ha ka bynta ba nyngkong” ula bynrap.
Kat kum ka jingong jong u, ka thong kan long ban wad ruh ia ki nongpyndonkam bording kiba pynsah ia ka bai bording ba palat T. 1 lak bad ki ba khlem siew ha kine ki lai haduh hynriew bnai.
“Namar kata, nga kyntu ia baroh ki nongpyndonkam bording khamtam kito kiba kot bor ban siew bad ki bym don jingeh satia halor ki bill, ba kin sngewbuh ban wan shakhmat bad siew noh ia ka bai bording khnang ba ngin lah ban pynjanai ia ka jingsam bording” ula ong.
Haba kylli, u Goyal u pyntip ba ka bai bording kaba dang sahteng ban siew haduh mynta kala kot ia palat T. 300 klur.
Pule lang ia kane: Pyntip ka MeECL ban nang khate ia ki kynta pynlip bording lada dang bteng ban hap slap
