Shillong, Risaw 06: U Executive Member (EM) ka Land & Building ka KHADC Bah Teiborlang Pathaw, hynne ka sngi Thohdieng, ula pyntip ba ka Council kala ioh iaka jaka kaba 4000 Sq Ft na ka shnong Mawlai Mawroh, ban shna ia ka Resource Recovery Center (RRC) ne ka jaka tylliat ia ki niut da ka jingstad saïan (Scientific).
“Ha u Naiwieng, ka Council kan sdang ban pyntri ia ka Resource Recovery Center (RRC) kaban treikam katkum ka juk stad saïan ne ka jaka tylliat niut bad ka shnong Mawroh kan dei kaba nyngkong eh kaban ioh ia kane ka skhim. Ka shnong Mawroh kala ai jaka 4000 sq ft ban shna ia kane ka RRC” ong u Bah Teiborlang Pathaw.
Ula ong, ba ka RRC kala don teng ha ka shnong Umpling bad kadei kaba la leh da ka tnad Urban hynrei ka RRC ha Mawroh kan dei beit ka projek jong ka District Council bad ia ki niut ki nier ha Mawlai Mawroh kin leit beit ha katei ka RRC.
U Executive Member ula ong, ba ka Council kan sa pynsngewthuh ia ki paidbah ba ka jingphiah ne jingbynta lypa ia ki niut kadei ban long lypa na man la ki longiing.
“Te lashai, lada donkam ban don iaka ‘Landfill’ ne jaka bret niut kaba heh ha kiwei pat ki jaka kan ym long shuh kum ka Marten. Lada ngi leh ma ngi, ngin leh ha ka jingstad Saian (Scientific) ha kaba iaki jaboh kiba pynmih ha ki shi sngi ne ar sngi kan leit sha ki bynta kiba kadei ban leit, sha ka Compose Plant ban pynmih sboh ne ban pynmih iaka bording” ong u Bah Pathaw.
Ula ong, ba ka Council kala leit jurip sha ka jylla Goa bad la shem ba ia ka Waste Management kaba la leh da ka sorkar Goa kala im kum ka Park ym kum ka jaka bret niut bad ka long kaba itynnad bha bad lada lah ban wanrha ia kum katei hi ka rukom treikam kan iarap bha ia ki paidbah.
U Bah Teibor ula ong, kiba bun ki shnong kila kmen haba la ioh jingmynjur ka Khasi Hills Autonomous District (Solid Waste Management) Act 2020 bad ka daw ka long ba la pynkup bor ia ki mynta bad iaka Solid Waste Management Commitee jongki shnong yn ithuh noh da ka District Council” ong u Bah Pathaw.
