Shillong, Naiwieng 14: Katba ka pung Umiam, kaba la pyniap mat ia baroh na ka jingithiang ka sawdong sawkun, ka dang pynkhreh ban pdiang ia ka jingwan jong ka hotel 7 star ba nyngkong eh ha Meghalaya, ka Jylla ka dang wad ruh ia ki lad ki lynti kiba thymmai ban sei ia ka spah mariang ba ithiang sha ka pyrthei.
U Myntri Rangbah ka Jylla Conrad K Sangma hynne ka sngi Palei, u la ïashimbynta ha ka jingpyrshang ban pynher ia ka liengsuin duriaw ne seaplane ha pung Umiam, kaba dei ka sienjam kaba kongsan bha ban pynkhlain ia ki lad pyniasoh jong ka Jylla sha kiwei pat ki bynta ka Ri.
Ia kane ka jingpynher liengsuin duriaw ha pung Umiam la pynlong da ka Tnad Transport ka Jylla Meghalaya bad ka Ministry of Civil Aviation ka Sorkar Pdeng ha ka jingiadonlang u Myntri ka Civil Aviation Kinjarapu Rammohan Naidu.
U Myntri Rangbah ka Jylla ula pyntip ïa ka jingangnud jong u ban pynlong ia ka Jylla Meghalaya kum ka jaka jngohkai kaba hakhmat eh, khamtam haba ka kaiphod jong ka Skyscanner 2025 Travel Trends Report ka la jied ïa ka Shillong kum ka jaka jngohkai kaba hakhmat eh ha India.
“Ka hotel 7 star ka ban wan ha ka pung Umiam ka dei tang ka jingsdang,” ong u Sangma, “bad ka jingshakri jong ka liengsuiñ duriaw ka lah ban plie lad shuh shuh na ka bynta ka kam jngohkai pyrthei da kaba pynsuk ïa ki nongleit jingleit ban leit sha ki jaka ba itynnad kiba don ha kylleng ka jylla jong ngi.”
Ka jingpynher ïa ki liengsuiñ duriaw ka la pynksan ïa ka jinglah jong ki liengsuiñ duriaw ban weng ïa ki jingeh ba kyrpang jong ka Meghalaya ha ka liang ki lad pyniasoh. Haba iathuh khana ia ki jingshem jong u kum u nongseng kam seng jam uba hap iaid da ka bus ha kylleng ki Jylla ka thain Shatei Lam Mihngi, u Sangma u la pynpaw kumno ki jingleit jingwan ki shim bha ia ka por.
“Ha kito ki por, ka lah ban shim por haduh 20 kynta ban poi sha ki nongbah jong ki jylla kum ka Kohima bad Imphal”, u la ong. “Naduh ba ngi la shimti ïa ka Sorkar ha u snem 2018, ngi la trei ban pynlong ïa ka kam liengsuiñ kum ka mat ba kongsan tam na ka bynta ka Jylla Meghalaya. Da ka jingphaikhmat ka skhim UDAN ïa ka jingpynïasoh ha ki thaiñ, ngi la ïohi ïa ka jingkiew kaba khraw bha, hynrei ki liengsuiñ duriaw ki lah ban shim ïa kane ka sienjam kaba kham shakhmat.”
Ki liengsuiñ duriaw, kiba donkam tang 200 meter ka um bad ka jingjylliew kaba tang san meter ban treikam, ki lah ban pynkylla ïa ka leit ka wan ha kylleng ki jaka jong ka Meghalaya kabadon kyrhai ki jaka lang um.
U Sangma u la kdew ba ka jingthaw ïa ki jaka pyllang um kiba rit bad kiba lah ban hiar liengsuiñ ka lah ban long ka lad kaba kham dun aka jinglut haba nujor bad ka jingshna ia ki kad liengsuin ba pura. Ki projeck kum ka pung um ba thymmai ha Tura, kaba pynbiang ruh ia ki jingdonkam um ki nongshongshnong, ka dei kaba lah ban pynlong kum ka jaka her bad wan dem ki liengsuin duriaw.
U Myntri ka Civil Aviation u la kdew ba ka jinglong jingman ki jaka ha ri India—ryngkat bad ki 1,300 tylli ki dewlynnong, ki pung bad ki wah bym lah kheiñ, bad ki rud duriaw kiba heh—ka long kaba biang bha na ka bynta ki jingshakri jong ki liengsuiñ duriaw.
“Ngi la thrang ban kyrshan ïa ki jingdonkam jong ka Meghalaya ha ka liang ka jingpyniasoh liengsuiñ, bad ki jingtei ha ka pung Umiam ki dei ka jaka sdang kaba biang bha,” u la ong.
“Ki liengsuiñ duriaw kan plie ia ka lad ban kyntiew ia ka ioh ka kot bad ka kabu ban pynkhlain ia ki kam jngohkai ha ka thain Shatei Lam Mihngi”.
Ka liengsuiñ duriaw ba la pynher mynta ka sngi, ka dei kaba la shna da ka De Havilland Aircraft jong ka Canada bad kaba la pynïaid da ka SpiceJet.
