Shillong, Nohprah 5: Ka Jylla Meghalaya ka dang shimkhia ban kyntiew ïa ki jingtei bapher bapher katba ka dang pynkhreh ban pynlong ïa ki tamasa jong ka tem ka put kiba heh ha ki bnai ban wan.
Ka jingwan jong ki nongrwai kiba pawnam kum u Ed Sheeran, u nongrwai ba pawnam jong ka ri Canada u Bryan Adams bad ka kynhun rwai rock jong ka ri America u Mr.Big ,ka pyni ia ka jingioh jingithuh jong ka jylla Meghalaya kum ka jaka pdeng jong ka kolshor bad ka kam jngohkai.
U Myntri ka kam jngohkai u Bah Paul Lyngdoh ula banjur ia ka jingkongsan jong kitei ki tamasa bad ula ong, “Ka Meghalaya ka dang kiew stet kum ka jakapdeng jong ka kolshor ha ka pyrthei. Ka jingpdiang ïa ki nongrwai kiba pwanam, ka pyni ïa ka jinglah ka jong ngi bad ka kyntiew ïa ka jingpyrshang jong ngi ban buh ïa ka jylla ha ka map jong ka pyrthei.”
Ka sorkar Meghalaya kala pynsted ïa ki jingpyrshang ban pynbha ïa ka lad pyniasoh bad ki jingtei. Ka jingpynheh ïa ka Runway jongka Shillong Airport kadei ka projek ba hakhmat eh kaba thmu ban pdiang ïa ki liengsuiñ kiba heh bad ban lah ruh ban don ïa ki liengsuiñ kiba her beit na ki nongbah ba heh kum ka Delhi, Mumbai, Kolkata, Hyderabad bad Bengaluru.
Haba kaba iadei bad ka jingiaid shaphang jong ki kam, u Bah Paul Lyngdoh ula ong, “Ka kam kala ïaid shakhmat ha ka rukom kaba biang bad kaba bha. Ka jingpynbha ïa ka jingher ki liengsuiñ kan pynlong ïa ka Meghalaya kaba kham suk ia ka leit ka wan jong ki nongjngohkai bad kan pynkhlaiñ ïa ka ïoh ka kot ha ka kam jngohkai.”
Nalor kane, ka Kylla ka don ruh ia ka jingthmu ban wanrah ïa ka jingshakri da kaba pyndonkam ia ki Helicopter kaban pynïasoh ïa ka Guwahati bad ki jaka jngohkai kiba kongsan kum ka Umroi Airport, Umiam, Sohra, Dawki bad New Shillong. Kane ka jingthmu kan pynsuk ia ka leit ka wan ia ki nongjngohkai bad kan pynthikna ba kin lah ban ioh peit bniah ïa ki jingitynnad jong ka mariang bad ka kolshor jong ka jylla da kaba suk.
Ieng lain ki Nongrwai ba pawnam ka pyrthei ban wan sha Shillong
Ka jylla kala pynkhreh ban pynlong ia ka Concert jong u Bryan Adams ha ka 10 tarik u Nohprah ha Polo Ground, Shillong.
Katba u Ed Sheeran uba la ioh khur iaka khusnam Grammy yn pynshongshit ia ka nongbah Shillong ha ka 12 tarik u Rymphang 2025, kum shi bynta jong ka jingwan rwai wan tem ka jongu ha ki 6 tylli ki nongbah jong ka ri India.
Ka kynhun Mr. Big, kan iashimbynta ha ka Bloomverse Festival kaban long ha ka 14 tarik u Rymphang ha Umiam, kaban dei syndon ka jingai khublei ia ka jingwan tem khatduh ha Shillong kaba la tip ruh kum ka “The BIG Finish Tour.”
U Myntri ka kam jngohkai u Bah Paul Lyngdoh ula ong, ba kine ki jingjia ki iadei bad ka jingiohi jngai kaba ka jylla ka don.
“Kine ki jingpynisap kim dei tang ki kam pynbyrngia hynrei kin long ruh kum ka jingpynshisha ïa ka jinglong ba la pynkhreh jong ka jylla ban pynlong ïa kino kino ki jingialang ha ka pyrthei, kaban nang pynskhem ïa ka nam jong ka Meghalaya kum ka jaka jngohkai pyrthei ha ka kolshor bad ka jngohkai pyrthei” ong u Bah Paul.
Katba u Myntri Rangbah ka Jylla u Conrad Sangma bad ka sorkar ka jongu, kila ïaineh ha ka jingskhem jingmut ban kyntiew ïa ka kyrdan jong ka Meghalaya ha ka pyrthei baroh kawei bad nalor ki kam pynbha ïa ki jingtei, la shim ruh ia ki sienjam kiba dang ïaid shakhmat ban pynlong ia ka kam jngohkai pyrthei kaba lah ban kiew shaphrang bad ka jingpynneh pynsah ïa ki jingdon jingem kiba kyrpang ka jylla.
