Guwahati, Risaw 04 : Ka Election Commission kala sdang ban pynkhreh ha kaba iadei bad ka jingpynlong ia ka ilekshon Assembly ha ki laitylli ki jylla ka thain shatei lammihngi (Northeast) hapoh Tripura, Nagaland bad Meghalaya.
Ia kane ka ilekshon ha Tripura, Meghalaya, bad Nagaland la khmih lynti ban pynlong ha u bnai Rymphang jong u snem u ban wan.
Katkum u heh ka tnat pyniaid ilekshon, la ong ba ka tnat ba dei khmih kala phah kumba 5,000 tylli ki Electronic Voting Machines (EVMs), ba la shna da ka kompeni Electronic Corporation of India Ltd kaba don ha Hyderabad lyngba ki 15 tylli ki trok kiba kyrpang.
“Ha ryngkat ka jingiadon lang ki nongmihkhmat na ki party sain hima, ngi la thep ia kine ki EVMs ha kine ki trok ha ryngkat ka jingsynran lang ki bor pahara.Shen ia kine ki EVMs ngin sa pynpoi sha baroh ki sub division,” ong utei u heh ka tnat ilekshon.
Une u heh ba dei khmih ula ong ruh ba ki dkhot na ka National level Master Trainers (NLMT) ba la thung da ka Election Commission ha ka taiew ba la lah kila pynlong ka jingai jinghikai sha baroh ki phra ngut ki District Magistrates bad Additional District Magistrate halor ki mat kiba kongsan na ka bynta ka jinglah ban pyniaid beit ia ka ilekshon.
Ha Nagaland na ka liang ki resource person na ka Election Commission bad ka India International Institute of Democracy and Election Management dang shen kila pynlong ia ka prokram aijinghikai kaba ar sngi na ka bynta ki Deputy Commissioner bad ki District Election Officer na ka bynta ban pynkhreh ia ki heh sorkar jong ki district ha kaba iadei bad ki jingdonkam kiba iadei bad ka jingpynlong ia ka ilekshon.
Na ka liang u Chief Electoral Officer ka Nagaland u V. Shashank Shekhar ula pynpaw halor ka bynta kaba kongsan bala shim da ki bor khmih ilekshon jong ki district bala khlieh da ki Deputy Commissioner bad District Election Officer ha kaba iadei bad baroh ki jingdonkam kiba iadei bad ka jingpynlong ia ka ilekshon.
Ka prokram aijinghikai na ka bynta ki heh sorkar ki district halor ki kam pyniaid ilekshon yn sa pynlong shen ha Meghalaya.
