Shillong, Risaw 12: U President ka BJP-Meghalaya Bah Ernest Mawrie ula pyntip ba ka BJP kan sa pynlong ia ka jingiakhun pyrshah ia u droks ban lah rat dyngkhong ia une u jingdih pynbuaid hapoh ka Jylla.
“Ngi la dep pyntip sha ki Nongialam ha Delhi bad ia ka plan ba pura yn sa sdang pyntreikam da ka BJP ban rat dyngkhong ia ka jingktah jong u droks ha Meghalaya” ong u Bah Ernest Mawrie, President ka BJP ha ka kyrwoh.
Kat kum ka jingong jong u,ki Booth Level Karyakartas ( ki dkhot ha ki Polling Booth) kin sa leit rung ha manla ki thliew iing na ka bynta kane ka kam.
“Ngi la shimkhia shisha ia kane ka kam bad ngin sa pynthikna b aka Meghalaya kan lait noh na une u jingdih pynbyaid da ka jingkyrshan lem ka Sorkar BJP ha Jylla bad ka sorkar Pdeng” ong u Bah Ernest.
Dang shen, kumba 40000 kg u droks bala kurup da ka Narcotics Control Bureau bad kiwei ki Agency jong ki Jylla ka thain Shatei Lam Mihngi, la thang ha ka sngi saitjain ba la lah ha Guwahati ia kaba la peit lang da u Myntri kam Pohiing ka Ri u Amit Shah lyngba ki kor video.
“Kane ka pyni ia katno ka jingshimkhia jong ka Sorkar Pdeng halor ka kam droks hapoh ki Jylla ka thain Shatei Lam Mihngi kaba la pynkhuslai jur ruh ia ka Jylla Meghalaya namar ka jingnang bun ki longiing bad ki jingim kiba la shah pynjot na u” ong une u Nongialam ka BJP.
Dang shen, ka Shillong Contonment Board (SCB) bad u MLA ka Shillong South Bah Sanbor Shullai kila phah pynpra bad jynrat naduh dyngkhong ia kawei ka ktem khaii droks kaba don ha Contonment.
“Kane ka dei tang ka jingsdang bad ka BJP Meghalaya da ka jingkyrshan ka Sorkar Pdeng, kan iai bteng ban iakhun pyrshah ia une u jingdik ba sniew tad haduh da lah ban rat syndon naduh dyngkhong. Ym pat don satia kawei ruh ka sorkar kaba lah ban tem ia kane ka jingeh ha Meghalaya” ong ka BJP.
