Guwahati, Nailar 03: Kum shi bynta jong ka ‘Har Ghar Tiranga’ initiative, na ka liang ka sorkar Assam ka don ia ka jingthmu ban don la kumno kumno haduh 80 lak tylli ki lama jong ka ri India ha baroh kawei ka jylla.
Ka jylla kan thied haduh 50 lak ki lama jong ka ri na ka Union Ministry of Textiles na ka bynta ka ‘Har Ghar Tiranga programme’ ka ban long naduh ka 13-15 tarik mynta u bnai, bad ia ki 30 lak kiwei pat yn shimti da ki Self help group.
Ka ‘Har Ghar Tiranga campaign’ ka la khring jur hapdeng ki ba bun ki paidbah nongshong shnong. Wat ha ki thain ki ba kyndong jong ka Dima Hasao district ka Assam, ki nongshong shnong bad ki kynhun bapher bapher ki la pyrshang ban pynlong ia kane ka jingialap ka ba jop.
Kane ka jingialap ka ba hap hapoh ka ‘Azadi Ka Amrit Mahotsav’ ka long ban pynshlur ia ki nongshong shnong ba kin wanlam bad ban wah ia kane ka lama lai rong jong ka ri ha la ki jong ki iing ki sem shibynta ka jingrakhe ia ka lyngkhuh snem ka ba 75 ka jingioh ia ka jinglaitluid.
Ka jingthmu sha lyndet jong kane ka sienjam ka long ban don ia ka mynsiem ka jingsngew shlur hapdeng ki paidbah nongshong shnong bad ruh ban pynshai bad kyntiew ha ka ba iadei bad ka jingtip ia ka lama jong ka ri India.
