Shillong, Naitung 15 : U Symbud Myntri Rangbah ka Tnad Urban Affairs Bah Sniawbhalang Dhar un sa hiar jurip ia ki project ha New Shillong Township ha ka 30 tarik Naitung namar ki jingsngewkhia na ka Chief Minister Office (CMO) ba don ki project kiba iaid suki.
U Bah Sniawbha ula iathuh ba bun na ki project kila iaid shaid shaid hynrei ki don ruh katto katne kiba suki ka jingpyntrei.
“Nga la buh ban hiar jurip hi dalade ha ka 30 tarik Naitung. Ngin pyrshang ban pynbeit ia baroh ki jingeh” ula ong haba iakren bad ki nongthoh khubor.
U DyCM ula pyntip ba ka Ophis u Myntri Rangbah kala pynpaw ia ka jingsngewkhia halor ki jingpyntrei suki ia ki project sha ka tnad jong u.
“Ngi la ioh ia ki jingtip na ka Chief Minister Office ba katto katne ki project kila iaid suki bha. Kila sah shadien bha” ula ong haba pyntip ba ka Tnad kan kyntur ia ki contractor ba kin pynsted noh shaid shaid ia ki kam.
“Ngin sa kyntu ia ki ba kin pyntrei sted noh kham kloi kat kaba lah. Ha kane ka jingjurip, ngan sa bthah ia ki contractor ba kin buddien bha iala ki jongki project” ula ong.
Haba kdew ia ka suinbneng ka Jylla kum ka jingeh ba hakhmat eh, u bah Sniawbha ula ong ba ka Jylla ka don tang 6-7 bnai ka por treikam namar ka jingjur u slap.
“Ka Meghalaya ka dei ka jaka hap slap ba jur. Ka por treikam ka duna bha. Haba iadei bad ki jingsiew, kam shym la don ka jingpynslem na ka liang jong ngi. Ngi la pynlait ia ka pisa ha ka por kaba biang. Ki contractor kila ong ba u slap u dei ka daw ba pynslem, ngin sa iakren bad ki” ula ong.
 ba don ki project kiba iaid suki.){kind=link}