Khang lynti ki bor District ia u Bah Ardent ban tur shakhmat
Shillong, K’lyngkot 22 : Ki bor District bad Pulit, kila pynjur bha ia ka jingpahara ha ki jaka ba marjanka Secretariat namar ka jingthmu iatur paidbah ka Liang Pyrshah Voice of the People Party (VPP) sha Secretariat ban pynbor ia ka Sorkar Jylla ba kan thungkam biang ia ki lai ngut ki Ophisar ba shah wengkam ha Lokayukta.
Ki Dkhot ka VPP bala ialam da u President Bah Ardent M Basaiawmoit, MLA ka Nongkrem ha ryngkat u MLA ka Mawlai Bah Brightstarwell Marbaniang, kila iatur hynne ka step sngi nyngkong sha Secretariat hynrei kane ka jingpyrshang kala pulom da ka jingdon ki bor pahara kiba la khang lynti noh ia ki hajan ka Parking Lot jong ka Additional Secretariat
Ki bor pahara la iohi ba naduh dangstep, kila pyrrkhing bha ia ka jingpahara naduh ka thain Civil Hosital, Barik Point, Kachari Point bad Raj Bhavan.
Nalor ka jingpahara, la iohi ba ki Pulit kila kylli bniah ruh wat ia ki kali kiba iaid sha ki thain Secretariat.
Hadien ka jingiasaid kaba jur, ki bor District kila shah ia ka VPP ba kan ialum paidbah ha Parking Lot jong ka Additional Secretariat.
Lah ban kdew hangne ba ka Deputy Commissioner ka East Khasi Hills, kala pynjari ia ka kyndon 144 CrPC, kaba treikam hapoh u pud ba 200 meter na Secretariat, Additional Secretariat bad Raj Bhavan.
Kane ka khliehduh ka District kala dep pyntip ruh sha ka VPP lyngba ka shithi, ba kane ka ain kala treikam hapoh ka Nongbah.
