Shillong, Nailar 06 : Namar ka jingiai btenng ki kam umsnam ha Bangladesh, ki shipai BSF ka Meghalaya Frontier, kaba khmih ia u pud ba 444 km bad ka Bangladesh, kila pynkhlain bha ia ka jingiaid pahara ban pynthikna ban nym don ka jingrung ne prong tuh shapoh u pud u sam ka India.
Ki shipai BSF kila pynjur ruh ia ka jingkhynra ha shilynter ka khappud ban khanglad ia ka kam khaii beain bad kiwei kiwei ki kam bymman.
U IG ki BSF Meghalaya Frontier Sh Harbax Singh Dhillon ula ong ba ki shipai bad ki field commander kila tip bha ia kaei kaba jia bad kila pynjur bha ia ka jingpeitngor,
“Ka jinglong jingman sha shiliang u pud ka dei kaba la peit pyrman bha khnang ban lah tehlakam ia kino kino ki jingjia ki bym lah ban tip lypa. Ki Heh Ophisar bad ki Commandants kila don mynta sha ki jaka khappud bad la bthah ba kin pynlong khlem sangeh ia ka jingkhynra” ula ong.
Baroh ki Land Custom Station bad ki Integrated Check Post ha ki jaka khappud ka Meghalaya kila don hapdeng ka jingpynkhlain bha ia ka bor pahara nalor ka jingpyrrkhing ruh ia ka iaid ka ieng jong ki riew paidbah hajan ki khappud.
Ka Sorkar Meghalaya kala pynjari da ka korphiw miet ha shilynter ka jaka khappud ka Jylla bad ka Bangladesh. Ki bor District bad ki Pulit ha ryngkat ka jingiatreilang bad ki BSF, kila pynjur ia ka jingpeitngor bad bthah ia ki nongshongshnong ba kin phikir bha ialade.
