Shillong, Rymphang 13 : U Myntri Rangbah ka Jylla Conrad K Sangma, ha ka sngi Thohdieng, ula plie paidbah ia ka Eklavya Model Residential School (EMRS) ha Samanda, Rikwarenggre, East Garo Hills, kaba dei ruh ka dak ka jingsdang ia ka jingpynlong skul bad ka jingpule ki khynnah riewlum ba sah ha skul (residential).
Kane ka campus ba thymmai, kaba la pynwandur ban ai jinghikai kat kum ki course CBSE sha ki khynnah Scheduled Tribe na ki jaka nongkyndong, la plie ha ka jingiadonlang u Myntri ka tnad PHE Marcuise N Marak bad kiwei ki Heh Ophisar.
Haba shim ia kane ka jingialang kum “kaba sah jingkynmaw bad kaba pynsngewbha shibun,” u Myntri Rangbah u la ong ba kane ka skul ka dei sa kawei pat ka jingtei ba kongsan ha ka kam pule dangle ha Jylla.
Haba pynkynmaw ia ka jingangnud jong u P. A. Sangma uba la khlad noh bad ka jingaiti jong u ha ka pule puthi, u la ong ba ki jingpynkylla kiba dang iaid shakhmat ha ka pule dangle, ka la pynlong ia kane ka khyllipmat kaba don jingmut shisha.
“Ka pule dangle ka dei ka nongpynkylla kaba khraw tam bad ka jingroi kaba khraw tam ia ka Ri, ka Jylla bad ka imlang sahlang” ong u Conrad haba pynpaw ia ka jingbteng ka Sorkar ban kynshew tyngka ha ki skul bad ki college kiba bha.
Haba kren halor ki jingpynkylla naduh u snem 2018, u CM ula pynpaw ba jan 80% ki skul LP bad UP ha Meghalaya ki dei kiba la dep ban maramot ne ioh iingskul thymmai kat haba donkam. Ula pyntip ruh ba la nang pynbha ia ka syllabus ka MBoSE, pynbeit ryntih ia ka rukom pynlong eksam, bad ka jingwanrah ia ka CM Impact Books ia ki khynnah klas X, kaba la noh synniang haduh 96% ka jingpass ki khynnah ka eksam SSLC ba dang shu dep.
Haba pyntip ba ka Meghalaya kala don 38 tylli ki skul EMRS, u Myntri Rangbah ula pynpaw ia ka jingsngewnguh ia ka Ministry of Tribal Affairs bad ia u Myntri Rangbah Duh namar ka jingkyrshan kaba khlem kut.
Halor ki jingkyrpad na ki bor pyniaid skul, u Conrad ula pynbna ban bei tyngka na ka bynta 20 tylli ki computer napoh ka Chief Minister’s Special Development Fund bad kular ban sa shimkhia ia ka jingpyniasoh telecom bad ki bor ba dei khmih. Ula bthah ia u Myntri ka tnad PHE ban buddien ha kaban pynbiang ia ka jingpynpoi um hapoh ka campus.
U Dr M Nandagopal, Principal ka EMRS, Samanda ula pyntip ba kane ka skul mynta kala treikam tad haduh klas VIII bad ki khynnah kila don 130 ngut, bad sa 50 ngut ki ban sa wan rung skul ha une u bnai.
Kiwei pat kiba la ai jingkren ki kynthup ia u Marcuise N Marak, u Deputy Commissioner ka East Garo Hills bad kiei kiwei.
 ha Samanda, Rikwarenggre, East Garo Hills, kaba dei ruh ka dak ka jingsdang ia ka jingpynlong skul bad ka jingpule ki khynnah riewlum ba sah ha skul (residential).){kind=link}