Nongpoh, Kyllalyngkot 10: Sa shisien ka ophis u Syiem ka Raid Marwet lyngba ka Sohjer Committee, mynta ka sngi ka la pyntip paidbah ba kan pynkhie im biang ia ka lehniam Sohjer kaba ju pynlong man la u snem hadien ba ym shem la ioh ban pynlong ia kane ka lehniam leh rukom mynta la 3 snem eiei naduh u snem 2020 na ka jingwan lynshop jong ka khlam COVID-19.
Haba kren bad ki Nongthoh Khubor, u Paiem Ken Syiem, Syiem ka Raid Marwet, u la iathuh, ba ka ophis u Syiem ka Raid Marwet ha ryngkat ka Sohjer Committee ka la shim ia ka rai ban pynkhie im biang ia ka lehniam Sohjer ban bteng ia ka lehniam leh rukom, ka duwai ka phirat bad ban pynneh pynsah ia la riti ka dustur, ha kaba la rai ban pynlong ia kane ka lehniam naduh ka 17 tarik haduh 20 tarik u Kyllalyngkot bad ia ka knia ka khriam yn pynlong ha ka 19 tarik Kyllalyngkot ha ka shnong 9 Mer Baridua.
U la iathuh ruh, ba ia kane ka lehniam lehrukom jong ka Sohjer ym shem la lah ban bteng ia ka naduh u snem 2020 namar ka jingwan lynshop jong ka khlam COVID-19, hynrei namar kane ka lehniam ka dei kawei na ki lehniam ba kongsan jong ka Raid Marwet, kumta na ka liang ka Sohjer Committee ka la rai ban bteng ia kane ka lehniam ha u snem 2023 ban pynkhie im ia ka lehniam leh rukom khnang ba ka pateng ban wan kan tip kan burom ia la ka riti ka dustur bad ka tynrai jong ka Raid.
U la pyntip ruh, ba ha kane ka Sohjer na ka liang ka Committee nalor ka lehniam leh rukom, ka knia ka khriam, kan pynlong ruh ia ki jingiakop bapher bapher ban ailad ia ki khun samla ban pynpaw ia ki sap ki phong bad yn don ruh ki prokram bapher bapher ban pynbyrngia ia ki paidbah nongshong shnong jong ka Raid Marwet.
