Khanapara, Naitung 20: Ka skulbah University of Science and Technology (USTM) kala pynkha ia kawei ka Block bala jer kyrteng ka Dr D.D Lapang Block hapoh ka skulbah, ban pynsahnam ia ka kyrteng u Dr. D.D Lapang Myntri Rangbah barim ka Jylla.
Ia kane ka Block la plie hi da u Dr D.D.Lapang ha ka jingialang ba long ha ka sngi Palei, ha ka jingiadonlang u Chancellor ka USTM Mahbubul Hoque, Bah Donlang Dohkhlet, Bah RB Shadap, President ka Ri-Bhoi Dorbar nalor kiwei ki heh ki hain, ki nonghikai bad ki Khynnah pule jong ka skulbah.
Haba ai jingkren, u Mahbubul Hoque uba dei ruh u trai ka USTM, ula pynpaw b aka jingainam ia kawei na ki jingtei jong kane ka skulbah ha ka kyrteng u Dr D.D.Lapang ka long shibynta ban ainam ai burom bad ban sngewnguh shikatdei eh halor u synniang bad ka jingshakri ba radbah jong u Dr Lapang kum u Nongmihkhmat ka Ri-Bhoi bad Nongialam ka Jylla.
“U Dr. Lapang u dei u wei na ki riewkhraw ba la shakri rangbah bad don bynta ha kiba bun ki mat bad ruh kum u Myntri Rangbah ka jylla ha kito ki snem kiba la leit noh bad haduh mynta kat kane ka rta ha ka jinglong rangbah ruh um shem la shongthait na ka kam shakri paidbah bad dang iai bteng ban pyni ia ki nuksa babha ia ka pateng kaban sa wan”, ong u Hoque.
Na ka liang u Dr. D.D Lapang haba ai jingkren, u la pynpaw ia ka jingkmen kaba khraw halor ka jinglong kaba kloi jong ki bor ka USTM kiba la ihun ban ainam ia kane ka building kaban shakri ha ka jingnang jingstad ia ki samla pule da kaba jer kum ka ‘Dr. D.D Lapang Block’.
U Dr Lapang ula pynpaw ba kum u wei na ki nongmihkhmat paidbah ka jylla Meghalaya, un iai don ryngkat bad ki bor ka USTM ha kino kino ki bynta ban kyntiew ia ka jingnang jingstad ha kane ka thain.
“Ka jaka ba kane ka USTM ka ieng mynta, mynshwa ka dei kaba sahdien bad ka dei tang ka khlaw kaba rben, hynrei ngan lah mutdur ba da ka jingshemphang jong u nongseng ha ryngkat ka jingiatreilang bad ki bor ka sorkar jylla Meghalaya, la mih paw pynban kane ka jaka pule kaba paw ym tang ha ka jylla Meghalaya hynrei ha baroh kawei ka thain Lam Shatei Mihngi,” ong u Dr. Lapang.
U Dr. D.D Lapang u la ai ruh ia ki kyntien kyntu kynpham sha baroh ki samla pule ba kumno kin long kiba minot thop ia la ki jingpule ha ki kyrdan bapher bapher khnang ba kin lah ban kynjoh ia ka thong ba ki don bad ba ka lawei ka jong ki kan long kaba phyrnai. Ula ai ruh ia ka jingkitbok kitrwiang ia ka kynhun jong ka USTM ba kan nang lah ban shakri kham bha ban kyntiew ia ka pule ka dangle ha kiba bun ki bynta.
 kala pynkha ia kawei ka Block bala jer kyrteng ka Dr D.D Lapang Block hapoh ka skulbah, ban pynsahnam ia ka kyrteng u Dr. D.D Lapang Myntri Rangbah barim ka Jylla.){kind=link}