Shillong, Nohprah 6 : Ka Sorkar Meghalaya kala hukum ban pynkha ia ka Police Outpost ba thymmai ha Barato, West Jaintia Hills ka ban tip kum ka Barato Police Outpost.
Ia kane la pyntip da u Secretary ka Tnad Home (Police) ka Sorkar Jylla.
Ka Barato Police Outpost ka dei kaba don hapdeng ka Saitsamla Outpost shaphang shatei, ka Jowai Police Station sha Mihngi, ka Raliang Outpost shaphang Shathie bad ka Nartieng PIC sha sepngi.
Lah ban kdew hangne ba dang shen, ka Sorkar Jylla kala rai ban pynkha ia ki Border Outpost ha ki 7 tylli ki jaka khappud jong ka Jylla bad ka Assam. Kane kala mih hadien ka jingjia ha Shnong Mukroh ha kaba san ngut ki nong Mukroh kila shah siat iap ha ki Pulit ka Assam bad Forest Guard ha ka 22 tarik u Naiwieng.
Ki Shnong kiba hap ha kane ka Police Outpost ba thymmai ki kynthup ia ka Barato, Mukroh, Saba, Maitdien, Jongkynshur, Iongkwang, Thangrain, Khliehsniriang, Shiliangmyntang, Thadsning, Thad Ialong, Musiaw, Samatan, Moobandu, Latymphu, Thadbamon, Umsalang, Lummuriap, Sowkhlieh bad ka Bhain.
Da ka jingpynkha ia ka Barato Police Outpost, baroh ki jaka kiba la pynhap ha kane ka Outpost kin ym don shuh bad ka Nartiang Police Station.
