Shillong, Lber 22 : U Myntri ka Tnad Community & Rural Development Abu Taher Mondal hynne ka sngi Balang, ula ong ba ka Sorkar kala pynkha dang shen haduh khyndai tylli ki Community & Rural Development Block (C&RD) ba thymmai ha Jylla.
“Ka Sorkar ka don ka jingmut ban rah shajan ia ka synshar khadar bad ka jingtreikam sha u paidbah” ong u Mondal ha ka Iingdorbar Thaw Ain.
Hynrei u Myntri ula ong ba kam shym la don satia kano kano ka jingtyrwa ban pynkha ia ka C&RD ba thymmai ha Mawhati bad Nongkrem haba jubab ia ka jingkylli bynrap bala wanrah da u MLA ka Congress na Mawhati bah Charles Marngar bad MLA ka VPP na Nongkrem Bah Ardent M Basaiawmoit.
U Bah Charles ula ong ba ka jingpynkha ia ka Block ba thymmai ha Mawhati ka dei kaba la dawa da ka Synjuk ki Rangbah Shnong, ia kaba la aiti da ka dorkhas sha ka Sorkar ha u snem 2021.
Ula kyrpad ia ka Sorkar Jylla ban ai jingmynjur ia ka jingdawa haba pyrkhat lem ia ka jingeh ba ki paidbah ki iakynduh namar ka jinghap ban iaid ym duna ia ka 80 km ban leit sha Umsning Block.
Haba kular ban khmih ia kane ka jingdawa, u Myntri ula ong ba ka Sorkar kan sa shong bishar bad kan sa shim ia ka rai lano ba donkam ban pynkha ia ka Block ba thymmai.
Hynrei ula ong ba kam shym la don satia kano kano ka kyndon ban pynkha ia ka Block thymmai hynrei ka jingthmu jong ka Sorkar ka long ban rah shajan ia ka jingshakri ka Sorkar sha u paidbah.
Pule lang ia kane: Bluit mih ka Vision Document ka VPP da ka Hindi – “Ym sngewthuh Hindi hynrei thoh bad pule te nang”
