Shillong, K’lyngkot 30 : Ka Meghalaya State Pollution Control Board (MSPCB) ka la pynjur ia ka jingkyndang ia ki karkhana kiba don ha Byrnihat namar ba kim bud ryntih ia ki kyndon ban iada ia ka mariang.
Ka jingjurip ba man ka por jong ka Board ka la pynpaw ba bunsien ki karkhana kim ju pynmeh ïa ki kor Pollution Control Device (PCD), kiba long kongsan bha ha kaban pynduna ïa ki jing pynmih lyer kiba sniew.
Ka jingpeithuh ia ka jinglong ka lyer ha Byrnihat
Ka MSPCB ka la pynlong ïa ka jingpeitngor man ka por ïa ka jinglong ka lyer ha Byrnihat lyngba ki Ambient Air Quality Monitoring (AAQM) stations kiba don ha ki saw tylli ki jaka: EPIP, 15th Mile, 17th Mile bad Khasi Killing.
Ia ka jingpeit bniah la pynlong arsien ha ka shi taiew, bad ia ki jingkhein jingdiah la buh ha ka Environmental Air Quality Data Entry System (EAQDES) jong ka Central Pollution Control Board (CPCB), Delhi. La pynphriang ruh lyngba ki lad pathai khubor, ka website jong ka Board, bad ka website jong ka bor synshar distrik ba dei peit ia ka thain.
“Da kaba pynshong nongrim ha ki jingkhein bala lum, ka jingbun jong ki jingpynjakhlia kiba mih na ka lyer kum ka SO2 bad NO2 ha Byrnihat ka dang sah hapoh u pud ba dang biang kat kum ka jingbuh da ka National Ambient Air Quality Standards (NAAQS). Hynrei, ka jingbun jong ki PM10 ha ka shisnem ka palat ïa u pud ba lah ban long uba long 60 μg/m3.
Namar kane la buh ia ka Byrnihat kum ka jaka Non-attainment city, bad la thaw ia ka City Action Plan (CAP), bad pyntreikam ia ki kam bapher bapher bad ki lad jingiada na ka bynta ban pynduna ia ka jingjaboh ka lyer. Ha ki jaka ba ki karkhana ki don hapoh ka Jylla Assam la buh kum ka CRITICALLY POLLUTED AREA (jaka ba jaboh bha) da ka Central Pollution Control. Board, New Delhi,” ong ka MSPCB.
Ka jingwad bniah kaba la tip kum ka Emission Inventory and Source Apportionment Study (EI&SA) na ka bynta ka Byrnihat la pynlong da ka CSIR-NEERI (Council for Scientific & Industrial Research – National Environmental Engineering Research Institute). Kane ka jingwadbniah ka thmu ban ithuh bad ai jingkhein ia ka jingpynmih tdem jaboh na ki tyllong bapher bapher. Ka CSIR-NEERI ka la pyndep ia ka jingwad bniah, bad ia ka kaiphod yn sa pynmih shen, kala ong.
Haba kren halor ki khubor ba pynmih da ki lad pathai khubor dang shen, ka Board ka ong ba dei ban buh jingkynmaw ba ïa ka AQI jong ka 341, kaba la kheiñ kum ‘Very Poor’, la pynmih na ki jingkhein ba la ïoh lum na Burnihat, Assam, lyngba ka Continuous Ambient Air Quality Monitoring Station (CAAQMS) kaba don ha ka Central Academy for State Forest Service, Burnihat, Assam. Kane ka jingkhein ka dei kaba iahap bad kaba lum ha ka 26 tarik u Jymmang, 2025, ha ka por 4:00 baje janmiet.
“Hynrei, katkum ki jingkhein na ki saw tylli ki Minitoring System ka MSPCB, ka Air Quality Index (AQI) jong ka Byrnihat na ka bynta u bnai Jymmang 2025 (haduh ka taiew kaba 4) ka dang long kaba biang. Napdeng ki saw tylli ki Monitoring Station, tang ka Station ha EPIP.” la buh ia ka AQI kaba ‘Pdeng’ ha baroh u bnai Jymmang,” ka la ong.
Ka Byrnihat, Ri-Bhoi District, Meghalaya ka dei kaba don haduh 27 tylli ki karkhana kiba pynjaboh ia ka lyer, bad la pyniabynta ia ki katkum ka jingjaboh ba ki pynmih kata : Red Category: 5 tylli ki karkhana bad Orange Category: 22 tylli ki karkhana.
La pyntip ruh ba ki don 35 tylli ki karkhana kiba pynjaboh ia ka lyer ha ka Thain Burnihat kiba hap hapoh ka Jylla Assam bad la pynbynta ia ki katkum ka jingpynjakhlia jong ki ia ka lyer kata: Red Caregory :20 tylli ki karkhana bad Orange Category : 15 tylli ki karkhana.
Da kaba shimkhia ia ka jingdon jong ki karkhana kiba pynjaboh ia ka lyer ha Byrnihat Area ha baroh ki liang ka Meghalaya bad Assam, kala don ka jingiatreilang hapdeng ki arjylla ban leh eiei halor ka jing jaboh jong ka lyer.
 ka la pynjur ia ka jingkyndang ia ki karkhana kiba don ha Byrnihat namar ba kim bud ryntih ia ki kyndon ban iada ia ka mariang.){kind=link}