Shillong, Nohprah 01 : Ka kynhun ki briew na Assam ha ka miet sngi U Blei, kila leit ban pynjulor ia u mot jong ka skhim MGNREGS ha ka shnong Maikhuli, kaba don ha khappud ka Ri-Bhoi bad Assam.
Kine ki briew na Assam kila wan rung jubor haka shnong Maikhuli ha ka por kumba 7 baje mynmiet bad kila tabain da ka rong iong ia u mot jong ka skhim MGNREGS, uba pynieng mar syndah bad ka pung dohkha jong ka Shnong, kaba don hapdeng ka jingiakajia pud hapdeng ka Assam-Meghalaya.
Ki nongshongshnong ka Maikhuli kila kam ba kane ka jaka ba pynieng ia u mot bad kumjuh ruh ka pung dohkha ka dei jong ka shnong Maikhuli, kaba la bsa ia ki longiing longsem ha Maikhuli la bun bun snem mynta hynrei ki briew na Assam ki thmu ban knieh jubor ia ka.
Kane ka jingwan leh donbor kala pynbitar lep ia ki nong Maikhuli bad kane ka jingbitar kala lam sha ka jingiashoh iadat bad iabom da ki dieng ki siej hapdeng jong ki bad ki nong Assam hynne ka step sngi Nyngkong. Da ka jingdon noh ki Pulit na baroh ar Jylla, la lah ban tem ia u paitbah bad la pynjur bha ia ka jingpahara ha ka thain.
U Deputy Commissioner ka Ri-Bhoi Abhilash Baranwal ula pynthikna ia ka jingkulmar kaba jia ha Maikhuli hynnin ka miet sngi U Blei bad pyntip ba ula phah ia ki magistrate bad ki Pulit sha kane ka jaka ban tem ia u paitbah hashuwa ban mih kino kino ki jingjia kiba sngewsuh.
“Ngi la phah shuh shuh ia ki Pulit bad ki CRPF sha Maikhuli ban pynkhlain ia ka pahara” ula pyntip.
Halor ka Peace Committee ba dang shu dep thaw dang ha ki khyndiat bnai hadien ba mih ki jingkulmar na ka jingiakam trai ia kane ka pung dohkha, u Deputy Commissioner u pyntip bakane ka Committee ka dang don bad kala dep shong jingialang ban pynbeit ia kae ka jingjia.
Haba kylli, u Deputy Commissioner u pyntip ba ki don ki riewshim kabu kiba kwah ban pynthut ia ka shongsuk shongsain ha ka thain bad ki Pulit ki dang tohkit ban lap ia kine ki briew.
“Ngin kem beit ia kine ki runar kam pher lada dei mano manor uh khnang ba kan nym mih shuh kaba kum kine ki jingjia hadien habud bad ba ki nongshongshnong na baroh arliang pud kin ialong kiba imsuk imsain” ula ong.
