Nongpoh, Nohprah 04: Hynne ka janmiet jong ka sngi Balang, ka kynhun jong ki Hati Khlaw kala leit sha ki jaka rep kba jong ki paidbah kiba sah ha ka thaiñ Sekurberia, ka thain kaba hap ha Hima Jirang, Ri Bhoi District.
La iathuh ba ha ka por kumba 4 baje, kane ka kynhun ki Hati Khlaw kaba don kumba 20 tylli ki Hati kala leit sha ki jaka rep kba kiba don ha ki jaka khappud jongka jylla Meghalaya bad Assam.
Katkum ka jingtip kaba la iohlum na ki riew paidbah katei ka thain, kila ong, ba ha kum kine ki por, ba kum kitei ki Hati khlaw, ki ju mih pyrthei bad ki leit bam ia ki kba kiba don ha ki lum bad ha ki pynthor ruh kumjuh.
Kila ong ba ki nongrep ki mad ia ka jingduhnong kaba khraw haba ki hati khlad kiba wan da ka kynhun ki ju pynjulor ia ka pynthor kba bad kane kala pynsepei lut ia ka por bad samoi rep jong ki nongrep.
Ki paidbah kila ong, ba dei ha kum kine ki por, ba ki hap ban ap ha la ki jong ki jaka rep kba, la ka long ha ki lum ne ha ki pynthor, ban beh ia ki Hati khlaw, kiba thmu ban leit bam kba.
