Baghmara, Iaiong 26: Ka jingpynjulor ia ki artylli ki wah ba kongsan ha South Garo Hills ba kynthup ia ka Wah Kanai-Mahadeo kala paw pyrthei mynta, kaba la pynbor ia ki Sengbhalang ban pynsngew ia ka jingpyrshah kaba jur ia kane ka jingpynjot mariang.
Ia kine ki wah la pynjot da ka kompani shna surok ka NHIDCL kaba pyntrei ia ka surok State Highway ba pyniasoh ia ka Baghmara ha South Garo Hills sha Ranikor ha South West Khasi Hills.
Ka jingtih jubor ia u shyiap n aka Wah Mahadeo kala pynjaboh khait ia kiba bun ki bynta jong ka Wah bad pyniap ia ki dohkha dohpnat ha kane ka wah.
Kane kala wan jia ruh hadien ba kane ka kompani kala bret khyndew bala tih na ka jingpynheh ia ka surok sha ka Wah Kanai, kaba la khang ia ka lynti iaid jong ka Um ha kiba bun ki jaka haduh ba ka wah kala hap thaw lynti iaid na kawei par ka jaka.
Namar kane ka jingtih shyiap bad jingbret khyndew ha ka Wah, ki jaka ri dohkha dohpnat bad ki sanctuary bala ri la sumar da ki nongshongshnong ka thain, kiba ioh jakpoh na kane ka wah, kala sdang ban jot bad duh noh.
Namar ka jingbitar ia kane ka rukom leh jong ka kompani, ka Achik Youth Welfare Organisation, kala leit ban ujor sha u Deputy Commissioner ka South Garo Hills ha Baghmara hynne ka sngi Balang, bad dawa ban pynsangeh mardor ia ka jingpynjot ia kine ki artylli ki wah ha South Garo Hills.
“Ka Wah Kanai kala shah khang lynti na ka jingbret khyndew da ka kompani bad ka wah kala shna lynti thymmai, ka ban sa ktah jur ia ka thain baroh kawei” ong u Benitto M Sangma, President ka AYWO.
Kaba nang pynsniew shuh shuh, ka kompani ka NHIDCL kala tih da ki ton u shyiap n aka wah Mahadeo ban shna ia ka surok, kaba la ktah jur ia kane ka wah.
