Shillong, K’lyngkot 10 : Ka Sorkar Jylla ha ka sngi Thohdieng, kala rai ban pynjlan biang sa hynriew bnai na ka shuti ba ju ai, sha ki Nongtrei Sorkar kiba hap ban leit sumar ia ki jingpang ba hap bujli dkhot met.
Kane ka rai kala mih na ka jingialang ba nyngkong eh mynta u snem 2025, jong ka Kynhun Myntri bala pyniaid da u Myntri Rangbah ka Jylla Conrad K Sangma, kaba long ha Sohra.
“Ka don ka rukom treikam ha ka Sorkar, haba ki nongtrei Sorkar ki don ha ka khep ba ki don ia ki jingpang ba jur, la ju ai shuti biang ia ki, kaba shong kat kum ka jingjur jongka jingpang. Nalor kaei kaba la don lypa, mynta ka Kynhun Myntri kala rai ba ki nongtrei Sorkar kiba hap ban leit bujli dkhot met, ngin ai sa kumba hynriew bnai ka shuti na ka bynta ka operation lane ban leh ia ka jingbujli dkhot met” ong u Conrad.
“Kane ka long palat bad halor jong ka kyndon kaba la don ban shim shuti bad kane ka dei ka kam kaba jyrwit jyrwat bha bad ka shong kat kum ki jingpang bad kumta, kam dei kaba treikam ia baroh” ula ong haba iakren bad ki nongthoh khubor.
Haba pynpaw kane ka kyndon thymmai ka shong eh ha ka jingsngew para briew, u Myntri Rangbah ula ong “Ha ki khep ba kum kine, ki donkam ia ka por ban nang khlain ne koit bad ki jingsumar bad ki jingdonkam baroh kiba hap ban leh. Khyndiat eh kila mih kum kine ki case (nongpang), nga kyrmen bad duwai ban nym mih shuh kum kine ki case (nongpang)”.
