Shillong, Lber 16: Ki bor district West Garo Hills ka la pynjlan biang iaka korphiw katkum ka kyndon 163 jong ka Bharatiya Nagarik Suraksha Sanhita (BNSS) ban tehlakam ia ki kam thombor bad pynthut ia ka shongsuk shongsain hapoh ka thain.
Katkum ka hukum ba la pynmih da u District Magistrate u Vibhor Agarwal, la pynjlan ïa ka korphiw ha baroh kawei ka district kum ka lad jingïada ban ïada na ka jingjur shuh shuh ki kam thombor bad ban wanrah biang ïa ka jinglong jingman kaba shngain.
Ka korphiw kan treikam naduh ka por 6:00 baje mynstep jong ka 17 tarik Lber haduh ka por 6:00 baje mynstep jong ka 18 tarik Lber tad haduh da weng noh. Ha kane ka por, la bthah ia ki nongshong shnong ba kim dei ban mih nala iing.
Hynrei ki bor District ka la pynbna ban pyllait ïa ka kowphiw naduh ka por 6:00 baje mynstep haduh ka por 6:00 baje janmiet ha ka 17 Lber ban ailad ïa ka jingïaid paidbah ban pyndep iaki kam ba kongsan. Ha kane ka por yn shah ia ki jaka pule, ki ophis Sorkar, ki bank bad kiwei kiwei ki jaka ban treikam.
Ka bor synshar district ka la ong ba ïa ka rai ban pynjlan ïa ka korphiw la shim hadien ba la bishar bniah ïa ki kaiphod na ki bor jong ka aiñ kiba pyni ba ki lad jingïada ki long kiba donkam ban pynneh pynsah ïa ka shongsuk shongsaiñ.
La bthah ia ki pulit bad ia ki executive magistrate ba kin pyntreikam tyngeh iaka hukum bad maham ba kino kino ka jingpynkhein ia ka korphiw kin shah pynshitom katkum ka kyndon 223 jong ka Bharatiya Nyaya Sanhita bad kiwei kiwei ki ain.
******
 ban tehlakam ia ki kam thombor bad pynthut ia ka shongsuk shongsain hapoh ka thain.){kind=link}