Shillong, Nailur 01 : Ka por ban pyndep ia ka Special Intensive Revision (SIR) 2026 ha Meghalaya lah pynjlan sa 14 sngi hadien ka jingsniew ka suk ka sain ha Shillong kaba la ktah ia ka hearing ha u bnai bala lah, bad ia ka electoral roll ba khatduh yn sa pynmih noh ha ka 21 tarik Risaw.
U Chief Electoral Officer (CEO) Dr BDR Tiwari ha ka sngi Ba-ar, ula shong bishar ia ka jingiaid ka jing phah notice bad ki hearing bad ki Deputy Commissioner, DEO, ERO bad AERO bad kumjuh ruh bad ki seng sain pyrthei.
Haba ai ia ki jingtip ba bniah,u CEO ula ong “Kat kum kaba long ba man mynta, 6,51,735 tylli ki notice lah dep ban pynkhreh ha kaba 5,71,989 tylli lah dep ban pynpoi sha ki nongthep vote. La bthah ia ki district ba kin pynkloi ha ka jingpynpoi ia ki notice ba dang sah bad pynthikna ba ki nongthep vote kin ioh ia ka lad kaba biang ban wan sha ki hearing bala buh bad ai ia ki kot ki sla kiba donkam”.
Na kine, 1,29,298 ki hearing lah dep ban pynlong. Ki Ophisar ki pyntip ba 297 ngut ki nongthep vote la shem ba kim lah ban rung ha ka electoral roll hadien ba bishar lut ia ki kot ki sla.
Haba batai ia ka jingheh ka kam ban pynshisha ia ki nongthep vote, u CEO ula ong “Kat kum ki jingkhein bala bishar, 2,22,786 ngut ki nongthep vote ki hap ha ka No Mapping Category, katba 4,28,858 la ithuh ba don jingbym biang ha ka jaka sah jong ki, kaba long baroh 6,51,644 tylli ki case ba donkam ban pynshisha”.
Kine ki kynthup ia ka jingbym iahap ki kyrteng bad ki kyrteng ki Kmie Kpa ha ka thup 2005 bad ki jingbakla ha ka rta hapdeng ki bahaiing hasem bala shem lyngba ka ECINET.
