Nongstoin, Naitung 12 : U Deputy Commissioner ka West Khasi Hills Bah Garod LSN Dykes, ula pynjari da ka kyndon 144 CrPC ba mana ia ki riew paidbah ba kin iatur shajan ki karkhana coke ba be-ain namar ba dang iaid ka jingpynpra ia ki atoskhana (chimney) jong ki karkhana be-ain.
Kat kum ka khubor, ia kane ka hukum la pynmih naduh ka 11 tarik Naitung bad la pyntreikam mar dor ha ka thain.
Ka hukum kaa khang pyrshah ia kino kino ki briew kiba khlem ioh jingbit lane ki kynhun ba kin iatur palat ia ka 1 km radius na ki jaka ba don ka karkhana coke ba beain ha Kyllonmathei, Shallang, West Khasi Hills.
Kat kum kane ka hukum, u Deputy Commissioner ula bthah ban pynpra lut ploin ia ki karkhana coke ba beain kat kum ka Order Memo No. NDG 304/2020/Pt11/79-A dt. 02/02/2023.
La ong ruh ba ka Sorkar Meghalaya kala ai jingmynjur ban pynpra ia ki atoskhana jong ki karkhana coke beain ha ka District kat kum ka shithi FOR 2/202/302 dt.4/7/2023.
Halor kane, la ai jingbthah ban pynpra ia ki karkhana coke ba beain hapoh ka District kaba sdang naduh ka 7 tarik Naitung, 2023.
Namar ka jingbym long shngain ia ka iaid ka ieng jong ki briew bym ioh jingbit shajan jong kine ki karkhana coke ha kane ka jingpynpra, kumta la pynjari da ka kyndon 144 CrPC.
Pule lang ia kane: Rai ki District Council ban thoh sha ka Law Commission ba pyrshah pyntreikam ia ka UCC ha Meghalaya
