Pynbna u CM ia ka song jingiarap ba T.50,000 sha ki Pulit ba mynsaw nalor ka bai dawai
Tura, Naitung 24 : U Deputy Commissioner ka West Garo Hills, ula pynjari da ka korphiw miet ha sor Tura namar ka jing mih ka jingkulmar hapdeng ka jingialang ba jai jai hapdeng u Myntri Rangbah ka Jylla Conrad K Sangma bad ki Nongialam jong ki kynhun Sengbhalang ha Chief Minister Office (CMO) Tura hynne ka janmiet sngi Nyngkong.
Kane ka jingialang ka dei kaba la pynlong da ka jingthmu ban iakren ia ki jingdawa jong ki kynhun Sengbhalang ia ka Winter Capital bad ka Roster System ba treikam naduh ki snem bala leit noh hynrei ki riew shimkabu kila pynmih ia ka jingkulmar da kaba lun maw ia ka CMO bad sha ki Pulit pahara nalor ka jingpyrshang ban plie jubor ruh ia ka khyrdop ban rung shapoh.
Wat hapdeng ka jingpyrshang ban tehlakam ia ka jinglong jingman, ka jingkulmar kala nang jur kaba lam sha ka jingmynsaw haduh 5 ngut ki Pulit pahara.
Kaba sngewsih ka long ba wat ka Ambulance kaba kit ia ki Pulit ba mynsaw ruh kala shah kawang maw ha kine ki briew. Ia kine ki Pulit ba mynsaw la kit noh mar mar sha Tura Civil Hospital ba kin ioh jingsumar.
U Myntri Rangbah ka Jylla ula pynbna ban ai ia ka song jingiarap ba mar T. 50,000 sha ki Pulit kiba mynsaw bad kular ruh ba ka Sorkar kan kitkhlieh hi ia ka jinglut jingsep ha baroh ki jingsumar ia ki.
Naduh ba mih kane ka jingkulmar, u Myntri Rangbah ka Jylla bala synran lang da ki Heh Ophisar kynthup u Myntri ka Tnad PHE Marcuise N Marak, ki dang sahkut shapoh ka Chief Minister Office. U Myntri Rangbah dalade ula peitthuh ia ka jinglong jingman bad ban peitthuh ia kine ki Pulit ba mynsaw da kaba jied ban shong ryngkat bad ki ha kane ka jaka.
Tad haduh ba thoh ia kane ka khubor kaba long kumba 9:30 baje eiie, u Myntri Rangbah u dang don hapoh ka CMO ha Tura.
