Shillong, Jylliew 13 : Ka District Magistrate ka East Khasi Hills, kala pynjari da ka kyndon 163 BNSS, kaba khang ban pynlong ia kino kino ki kynja jingiakhih, rally hapoh ka 200 meter na Secretariat bad Raj Bhavan.
Ia kane ka hukum la pynmih ha ka sngi Thohdieng, hadien katto katne kynta na ka jingiatur kynsan jong ka kynhun Confederation of Meghalaya Social Organizations (CoMSO) ban iakhih hakhmat ka Secretariat, ban pynpaw ia ka jingpyrshah halor ka jingslem ban pyntreikam ia ka Inner Line Permit (ILP) hapoh ka Jylla.
Kat kum ka hukum, ka DM kala ong ba la shem ba bun ki Sengbhalang ne ki kynhun seng ki ju pynlong ia ka jingiaid paidbah, rally bad jingiakhih na ka por sha ka por bad lada shah, kane kan pynthut ia ka leit ka wan ki kali, bad lam sha ka jingialum paidbah bad wanrah ia ka jingkhapngiah ba lah ruh ban pynthut ia ka suk ka sain u paidbah.
Namar kata, kala pynjari da ka kyndon 163 BNSS ba khang pyrshah ban pynlong ia kino kino ki kynja jingiakhih, rally hapoh ka 200 meter na Secretariat bad Raj Bhavan. La khang ruh ban rah ia kino kino ki kynja tiar ba lah ban pynmynsaw briew.
Ka ong ba ka jingpynkhein ia kane ka hukum kan khring iaka jingpynsajia kat kum ka kyndon 223 jong ka BNS bad kiwei kiwei ki kyndon kat kiba sngew iahap.
Ka pyntip ba kane ka hukum kan treikam noh mardor tad haduh da pynmih da kawei pat ka hukum.
