Shillong, Nailar 21 : Kum ka sienjam ban khanglad ia ka jingwan prong tuh ki nong Bangladesh sha Jylla, ki bor District ka East Khasi Hills kila pynjari da ka kurphiw miet ha shilynter ki jaka khappud bad ka Ri Bangladesh, ka ban treikam ha kine ki arbnai ban wan.
Kane ka kurphiw kan treikam naduh ka por 8 baje mynmiet haduh 6 baje mynstep hapoh u radius ba 1 kilometer na u zero line jong u khappud ka India-Bangladesh.
Ia kane ka hukum bala pynmih da ka District Magistrate Kong RM Kurbah ha ka sngi Palei, kala khang pyrshah ia ka iaid ka ieng ki briew ha ki jaka khappud da ka jingthmu ban jam ia u pud bad ka Bangladesh ne wan rung tuh sha khappud India, ka jingialum briew ba 5 ngut ne palat bad ka jingrah ia ki tiar kiba lah ban pyndonkam kum ki tiar ialeh kynthuh ki dieng/nar rod bad ki maw, nalor ki kam beain kynthup ia ka jingkhaii tuh ia ki masi, ki mar ki mata, kwah, tympew, khathad, bidi, sikret bad kiwei kiwei.
Ia kane ka hukum la pynmih haba khmih ia ka jinglong jingman ba mynta ha Bangladesh ha kaba lah iohi ba ka lah ban don ka jingwan rung tuh sha khappud daki riew bymman, ki ehrang jong ki kynhun kaikhlaw, ki nongkhaii tuh bad kiwei kiwei ki kam beain, ong ka kong Kyrbah.
