Shillong, Jymmang 23: U District Magistrate ka East Khasi Hills u SC Sadhu hynne ka sngi Palei ula pynjari iaka kyndon 144 CrPC ha ka 4 tarik u Jylliew kaba dei ka sngi niew vote jong ka elekshon MP Lok Sabha.
U Sadhu ula pyntip ba na ka bynta ban pynneh ia ka suk ka saiñ bad ka jingiaid beit iaid ryntih ka jingniew vote kumta katkum ka bor kaba la pynkup katkum ka 144 CrPC la mana tyngeh ban iaid proseshon ne rally hapoh ka jaka kaba don ki jaka niew vote haduh ban da kut ka jingniew vote bad ban pynbna iaka result.
Ka jingpyndonkam ia ki P.A. System/loudspeaker bad ka jinglehkmen da kano kano ka seng sain pyrthei ne kyrtong yn ym shah satia hapoh u pud u sam jong ka jaka niew vote.
Ban rah ia ki siej kiba sieh ia ka lam ne khlem sieh lama, ki dieng, ki tiar pynmeh ding, jingiaid proseshon ne ban ialang bun ngut hapoh u pud u sam jong ka 1Km na ka jaka niew vote kadei kaba la khang pyrshah.
Ka jingpynbthei bad ka jingkawnag ia ki bom pataka ha ki surok bad ha ki jaka paidbah kadei kaba la mana tyngeh ha ka sngi niew vote.
Ula pyntip ruh, ba la mana tyngeh ban iaid proseshon ne rally jingjop da uno uno u kyrtong ne seng sain pyrthei hadien ba la dep pynbna ia ka result hapoh jongka East Khasi Hills District.
Palat ia ka arngut yn ym shah ban synrang ia u kyrtong uba jop ne uno uno uba la shah pynkupbor ban shimti iaka certificate election na u Returning Officer.
Hapoh ka jaka niew vote, tang uwei u briew ryngkat bad ka ID/Car Pass kaba treikam kaba la ai da u District Election Officer, East Khasi Hills District, yn shah ban rung shapoh jong katei ka jaka.
Ym shah ban rah ia ka Mobile Phone bad Camera ha ki jaka hapoh kaba niew vote.
Kane ka hukum kan treikam mardor bad kan bteng ban treikam haduh ka 6 tarik u Jylliew 2024.
