Tura, Nailar 15 : Ka Tnad Arts & Culture kala pynlong ia ka jingpyni nam ia ki shnong Garo ha District Museum, Tura kaba don ha Dakopgre, Tura.
Kane ka jingpyni nam kala sdang naduh ka por 12 baje mynsngi bad kut ha ka por 3 baje janmiet. Ia kane ka museum la pynkylla kum ka jaka jngohkai ha kaba la pyni ia ki kam bapher bapher jong ki Nongshongshnong ka Ri-lum Garo.
Ia ka “KIMA” la pynieng ruh ha khyrdop kaba pyni ia ka jinglong nala tynrai jong ka shong Songsarek.
Nalor kane, kala don ruh ka jingpyni nam ia ka rukom otdieng, ki briew ba rwai ia ki jingrwai nala tynrai, ki kynthei kiba dang peh khaw, kaba pynkylla long ia ka museum kum ki shnong ki thaw ka thain.
Ka Shnong Garo kan ym pat kylla shong ba pura khlem ka “Nok A’chik” kaba la buh lang, ha kaba la iohi ia ki Kynthei kiba dang shet ia u “sakin’ u cake khaw bad katto katne ki bam nala tynrai katba ki shynrang pat la iohi ia ka jingpdiang ia ki briew da ka “pong’ kaba dei ka beer khaw.
Kawei pat ka jingpyninam ka long ia ki kynthei kiba dang kheit ia u kynphad (cotton) bad ki dang iathain jain.
Haba iakren bad ka Shlem, ka Norinchi G Momin, District Research Officer kala ong “Ha kane ka jingrakhe Independence Day ngi la leh ia kane ka live museum jong ki shnong Garo, ban nang pynibang shuh shuh khnang ba ki briew jong ngi khamtam ki samla kin tip khambha iala ka jong ka riti ka dustur bad tip shuh shuh halor ka jaidbynriew jong ngi”.
“Ka museum ka don ia shibun ki jingshna nala tynrai jong ki paid Garo bad jong kiwei kiwei ki jaidbynriew riewlum ka thain. Kane ka museum ka plieng naduh ka sngi Nyngkong haduh ka sngi Thohdieng” kala ong.
Pule ruh: To ngin iamap bad iaklet noh : Kyrpad u CM ka Manipur ban wanrah jingsuk na rynsan rakhe I-Day
