Shillong, Nailar 11: Ka Akashvani Music Concert kaba long ha ka sngi Saitjaiñ kala wanrah lang ia ki nongput nongtem bad ki nongrwai kiba tbit na kylleng ka jylla Meghalaya bad kila khring bha ia kito kiba sngewtynnad ia put ka tem bad ki sur jingrwai.
Kane ka Akashvani Concert ka iahap bad ka jinglong tynrai jong ka Sngi Ioh Jinglaitluid ha ryngkat ka jingrakhe ia ka put ka tem bad ki sur jingrwai ba hiar pateng bad la pynlong ia ka da ka Akashvani Shillong ha Soso Tham Auditorium, Shillong ha kaba la wan iashim bynta da ki nongput nongtem bad ki nongrwai kiba la rwai ia ki jingrwai ieid ri bad kiwei kiwei.
Ka jingrwai Hindi ‘Ae Mere Watan Ke Logo’bala rwai da ka Bateithymmai Nongrum ka la long ruh kum ka jingainguh ia kito kiba la aiti ia la ka jingim na ka bynta ka ri.
Ki nongput nongtem bad ki nongrwai kiba la iashimbynta kila ktik ia ki nongwan peitkai lyngba ka jingrwai khasi da ka kynhun ba ialam da ka Balahpynhun Mawlong bad Kitkupar Nongsiej, ki jingrwai Jaintia da ka kynhun ba ialam da ka Kong Silbi Passah bad ki jingrwai Garo da ka kynhun ba ialam da u Gladborn Momin bad u Bah Justine I Sun ula rwai ia ki jingrwai ba pawnam jongu, ka kynhun ba ialam da u Bah Donboklang Dohling bad samla Gwyneth Alicia Mawlong.
U Kongsan ha kane ka sngi, u Air Marshal SP Dharkar, PVSM, AVSM Air Officer Commanding in Chief, Eastern Air Command ula iaroh ia ki jingpyrshang jong ka All India Radio, Shillong ban rakhe ia ka put ka tem bad ka Sngi Ioh Jinglaitluid lyngba kane ka prokram.
Ula ong ba ka put ka tem ka don ka bor kaba khraw ban ktah ia ki briew bad ba kane ka bor ka long ryntih ha baroh ki jait deitiri, ka ktien ka thylliej ne ka jinglong jingman ha kylleng ka pyrthei bad ula ong, “Ka put ka tem kam don kano kano ka ktien kaba kyrpang, phi lah ban bud ia kano kano ka jait jingthoh ba la thoh ia ka lane phi lah ban kyntait ia kane, hynrei ki sur jingrwai ba sngewtynnad ki ktah beit ia ka mynsiem bad ki sah beit ha ka jingmut jingpyrkhat.”
U Dharkar ula ong, ba ka radio ka ju long ka tyllong ba heh tam jong ka jingpynbyrngia da kaba bynrap, “Ka ju long ka bynta kaba sngewtynnad bha jong ka jingim jong ngi, la kadei na ka bynta ka jingpynbyrngia, la kadei ban ioh khubor, la ka dei tang ban don ei ei hajan ha kano kano ka jaka ba ngi ju don”.
Ula ong, “Hynrei kaba kham kongsan shuh shuh, ka dei ka jingpynbyrnia ba ngi ju ioh lyngba ka Akashvani, lyngba ka radio, kaba ju iarap ban pynshemphang, ban pynsngewtynnad, ban pynkmen bad ka dei kaba ngi ju ap khmih lynti bha.”
Ha kane ka concert la wan iashim bynta lang ruh da u Additional Director General (A & BO) (CO – Akashvani) NEZ, Akashvani bad Doordarshan, Ashish Bhatnagar bad kiwei kiwei ki ophisar jong ka tnad.
