Shillong, Naiwieng 07 : Ka United Democratic Party (UDP) bad ka Hill State People Democratic Party (HSPDP) ha ka sngi Ba-ar, kila thaw biang ia ka Regional Democratic Alliance (RDA) ban iapynkhreh lang ia ka elekshon Lok Sabha, ka ban long ha u snem ban wan.
Ka RDA kala pynkhreh nadong hadong ban sei da u kyrtong iamon lang jong ka Alliance ha ka Shillong Parliamentary Seat.
U President ka UDP Bah Metbah Lyngdoh ula shah thung kum u Chairman jong ka RDA katba u President ka HSPDP Bah KP Pangniang kum u Secretary ka Alliance. U Nongialam ka HSPDP Bad MDC ka Mawkynrew Bah Martle Mukhim ula shah thung kum u Co-Chairman katba u President ka UDP ka East Khasi Hills Bah Titosstarwell Chyne kum u Asst Secretary.
Hadien ba pyniaid ia ka jingialang ka RDA, u Bah Metbah ula ong “Ngi sngewbha ban pyntip ba baroh artylli ki sengriewlum kila mynjur ha kaban pynthikna ba ka RDA ka dang iatylli kawei bad ban dang bteng ha kaban trei na ka bynta ka bha ka miat jong ka party”.
“Ngi la rai ruh ban thung da 11 ngut ki dkhot, ia kiba ngin sa jied da baroh artylli ki party” ula ong.
Une u Hehduh ka UDP ula ong ba ha ki snem bala leit, ki artylli ki sengriewlum kila iatreilang bad ka jingthaw biang ia ka RDA mynta ka sngi ka dei kumba la rai ha ka jingialang kaba long myn ha ka 30 tarik Jymmang, hadien ka elekshon MLA 2023.
Halor ka jingkylli, u Bah Metbah ula ong ba kiwei pat ki kam ki ban sa iakren hapoh ka jingialang ban sa long shen jong ka RDA ki kynthup ia u kyrtong ka Lok Sabha. Ula ong ba kane ka jingialang kan iakren bad shim ruh ia ka rai halor ka elekshon MDC ban wan jong ka KHADC bad JHADC.
U Bah Pangniang u pyntip ba ha kane ka jingialang la rai ruh ba hynriew ngut ki dkhot kin dei na ka UDP bad 5 ngut kin dei na ka HSPDP khnang ba kan dap pura ha ka jingdon ki nongkitkam hapoh ka RDA.
