Shillong, Naitung 26: Ka Hills State People’s Democratic Party (HSPDP) ka la pynsawa biang iaka jingdawa ban ithuh noh ia ka ktien Khasi kum ka ktien Sorkar (Official) jong ka Jylla Meghalaya, da kaba kyntu ia ka Sorkar Jylla ba kan shim iaki sienjam ban pynurlong iaka jingdawa.
Hadien ka jingiakynduh ia u Myntri Rangbah ka Jylla Conrad K Sangma, u President ka HSPDP Bah KP Pangniang u la ong ba ka Party kala aiti daka dorkhas kaba thymmai ban dawa ai jingithuh bad pdiang ia ka ktien Khasi kum kawei na ki ktien sorkar (Official) jong ka Jylla.
“Kane kam dei tang ka jingdawa ha ka saiñ hima sima hynrei ka dei ka jingkular ba kongsan jong ka Party” la ong u Bah Pangniang. “Watla ngi sngewnguh ïa ka sienjam jong ka Sorkar kaba kham mynshwa ba mynjur ïa ka Resolution ban dawa pynrung ïa ki ktien Khasi bad Garo ha ka Khyrnit kaba phra jong ka Riti Synshar ka Ri India, hynrei ngi ngeit ba ka Jylla ka dei ban ithuh shwa ïa ki Khasi hapoh ka rukom synshar jong ka.”
U la ban jur ba ka jingithuh da ka Sorkar kan don ka jingmyntoi kaba lah ban leh na ka bynta ki nongshong shnong kiba kren Khasi, khamtam eh ïa ki samla pule kiba mih ban iakhun haki eksamin daka ktien lajong.
“Ka la dei ka por ba ka Sorkar jong ngi kan ithuh ia ka ktien kaba long tynrai ha ka kolshor jong ka jylla” u la ong.
Watla ka ktien phareng (English) kadei ka ktien Sorkar (Official Language) jong ka Meghalaya, u Bah Pangniang u la kynthoh ba kam pyni ba ka dei ka ktien jong ka jylla, ha kaba ka ktien Khasi bad Garo ki long kiba la kren bha bad ki bat ia ka jingmut kaba jylliew ha ka histori.
U la ong ba u Myntri Rangbah ka Jylla u la pynpaw baka jingdawa ka long kaba don nongrim. “U Myntri Rangbah u la pynthikna ïa ngi ba ka Sorkar kan bishar bniah bha ïa kane ka kam bad kan wad ïa ki lad ki lynti kiba lah ban pynurlong iaka jingdawa”.
Halor ka jingithuh daka Sorkar Pdeng iaka ktien Khasi bad Garo, u Bah Pangniang u la ban biang ba ka Sorkar Jylla ka dei ban iai bteng ban buddien ia ka jingdawa ban pynthikna ba ka ktien Khasi bad Garo kin ioh jaka ha ka Eighth Schedule. “Ngim lah ban ailad ba kane ka mat kan jah noh—ka ïadei bad ki jingangnud bad ka jinglong jong ki briew jong ngi,” u la ong.
Lah ban kdew ba ha u snem 2018, da kawei ka sur ka Ïing Dorbar Thawaiñ ka Jylla Meghalaya ka la mynjur ïa ka Resolution kaba kyntu ïa ka Sorkar Pdeng ban pynrung lang ïa ki Khasi bad Garo ha ka Khyrnit kaba phra jong ka Riti Synshar ka Ri.
 ka la pynsawa biang iaka jingdawa ban ithuh noh ia ka ktien Khasi kum ka ktien Sorkar (Official) jong ka Jylla Meghalaya, da kaba kyntu ia ka Sorkar Jylla ba kan shim iaki sienjam ban pynurlong iaka jingdawa.){kind=link}