Shillong, K’lyngkot 20 : Ka India National Congress (INC) kala mad sa kawei ka jingtynjuh ha Ri-lum Garo da ka jingmih noh jong u MDC barim bad Khun jong u Myntri Rangbah barim Salseng C Marak na ka party bad pyniasoh ialade sha ka NPP ha Resubelpara, North Garo Hills.
U Silman K Sangma uba dei u Khun ba hehduh u Salseng, bad u MDC barim ka Rongrong Constituency jong ka GHADC, ula pyniasoh ialade sha ka NPP ba ialam da u Conrad K Sangma. La pdiang ia u da ki MLA ka NPP ba kynthup ia u Marthon J Sangma ba mihkhmat na Mendipathar bad u Marcuse Marak ba mihkhmat ia ka Williamnagar.
Kane ka jingpait ha kawei na ki Longiing barim tam jong ka Congress ha Ri-lum Garo, kala dei ka jingtynjuh kaba khraw ia ka party ha kum kane ka por ba ka jingialap elekshon kala sdang na ka bynta ka elekshon MLA 2023 ka ban long ha u 27 tarik Rymphang.
La pyntip ba u Silman ula mih noh na ka Congress namar ka jingbym sngewtynnad ia ka jingle lyndet jong ki Nongialam ka party haba phai sha ka jingai ticket ban iakhun elekshon. Ula pan ia ka ticket ban iakhun na ka constituency u Kpa na Resubelpara hynrei ula mad ia ka jingiaknieh kaba jur na uwei pat u nongpan ticket ia uba ki Nongialam ki sngewjan bha.
Une u dei u Doktor Twill Marak uba la pan ticket ban iakhun na ka Congress na Resubelpara.
Watla ka Congress kam pat shym la pynbna ia ka kyrteng ki kyrtong, ka dak kala paw shai ha ka kynroh ba pynbor ia u Khun jong u Myntri Rangbah barim ban mih noh na kane ka party barim jong u Kpa bad leit iasoh sha ka NPP.
Watla ka NPP kala dep rai ban pynieng ia u MLA ba mynta, u Timithy D Shira na Resubelpara, hynrei da ka jingwan rung jong u Silman sha ka NPP kan nang ai mynsiem shuh shuh bad kan ktah jur ia ka jingialap elekshon jong ka Congress ha ki sngi ban dang wan.
Kane ka sienjam ba ula shim kan ktah jur ia ka Congress khamtam ba u Kpa Salseng C Marak u dei u Myntri Rangbah barim uba la mihkhmat la bunsien ia ka Resubelpara. Ula jop ia ka elekshon ba khatduheh ha u snem 2013.
Kan long ruh ka jinglehrain ia ka Working President ka Congress Debora C Marak, kaba dei ka kynja kmienah jong u Silman.
