Shillong Naiwieng 13: U MLA bad MDC barim ka Nongkrem constituency Bah Lambor Malngiang, ha ka sngi Palei, ula leit pyniasoh ialade sha ka sem jong ka National People’s Party bad la pdiang burom ia u da u National President ka party bad Myntri Rangbah ka Jylla Conrad K Sangma ha ka jingdonlang ki Nongialam ba hakhmat eh ka party.
U Bah Lambor ula wan pyniasoh ha ryngkat bad ki spah ngut ki nongialam bad ki nongkyrshan ba radbah jong u, kiba la iadonlang ha kti hakjat jong u naduh ki elekshon bala dep.
Ia u Bah Lambor la pdiang burom ha ka jingialang kaba la pynlong hapoh ka Ophis treikam ka NPP ha Polo, kaba la sakhi ia ka jingwan iashimbynta ki Symbud Myntri Rangbah ka Jylla kynthup ia u Bah Prestone Tynsong, Bah Sniawbhalang Dhar, ki Myntri Sorkar, ki MLA bad ki nongtrei ka party.
Haba kren ha ka jingialang u Bah Lambor ula ong ba 2 snem mynshwa ki nongialam bad ki nongkyrshan ki jongu kila mana tyngeh ba un pyniasoh sha ka NPP hynrei mynta dei hi ma ki, kiba shim ia ka rai ban phah ba ngan pyniasoh noh bad ka NPP na ka bynta ban ai jingshakri ia ki paidbah ha ka Nongkrem Constituency bad ban pynkhlain ia ka NPP ha ka jylla baroh kawei.
“Ngam shym rung sha kane ka party ban ong ba ynda poi ka elekshon ngan iakhun ban rem. Em nga rung ban pyntikna ba ngin poi sha ka jingjop,” la ong U Bah Lambor.
U Bah Lambor ula ong ba ka jingwan ka jongu bad ki nongkitkam bad nongkyrshan kam dei tang ban shu pyniasoh bad ka seng NPP hynrei kin trei shitom ban pynthikna ba ka NPP kan jop syndon ia ka elekshon MLA ban wan na Nongkrem Constituency da ka jingiatreilang bad ka jingiatylli kum ka seng.
Ula ong ruh ba lada nujor ia ka roi ka par kaba wan ha ka constituency kala iapher bha, na kaei kaba ki paidbah ki ioh pdiang ha ka por ba u dang long kum u MLA bad ia kane la sakhi shai kdar da ki paidbah.
“Mynta sa shisien ka ai mynsiem biang ia nga ba ngin smat ngin sting, ngin khih ngin ksar na ka bynta ka bit ka biang jong ki paidbah” la ong u Bah Lambor.
Na ka liang u Bah Prestone Tynsong ula ong, ba ha ka elekshon MLA kaba la dep dei namar ka jingiakhun pyrshah u Bah Lambor ia ka seng NPP hynrei baroh ar ki lah ia rem lang ha ka elekshon hynrei mynta da ka jingiatreilang kin poi sha ka thong jong ka jingjop ha ka elekshon MLA ban wan.
